Azərbaycan Avropa İttifaqının strateji tərəfdaşı olmalıdır

Macarıstan Avropa İttifaqını Ukrayna və Gürcüstanla viza rejimini liberallaşdırmağa çağırıb.

Macarıstanın xarici işlər və ticarət naziri Pyotr Siyarto Avropa İttifaqını (Aİ) təcili şəkildə Ukrayna və Gürcüstanla viza rejimini liberallaşdırmağa çağırıb.

Bu barədə Ölkə.Az "Anadolu" agentliyinə istinadən məlumat verir.

Avropa İttifaqı XİN başçılarının iclasında çıxışı zamanı P.Siyarto qeyd edib ki, Aİ-nin şərq qonşularının təhlükəsizliyi çox zəifdir və bu Avropa üçün təhlükəlidir.

"Belarus, Gürcüstan, Azərbaycan və Ermənistanda qaynar və dondurulmuş münaqişələr mövcuddur", deyə macar nazir sözlərinə əlavə edib.

O bildirib ki, Aİ bu ölkələri dəstəkləməlidir.

"Ukrayna və Gürcüstanla viza rejimi liberallaşdırılmalıdır. Bu ölkələr qarşılarına qoyulmuş bütün əsas tələblərə əməl ediblər. Bu məsələdə gecikmək Avropanın təhlükəsizliyinə zərbə vura bilər",- deyə nazir vurğulayıb.

Siyarto həmçinin Azərbaycanla təcili olaraq Şərq əməkdaşlığına dair sazişin bağlanmasının vacibliyini qeyd edib.

"Xəzər sahilində yerləşən bu ölkə Avropanın enerji mənbələrinin diversifikasiyasında əsas rol oynaya bilər. Azərbaycan Aİ-nin strateji tərəfdaşı hesab edilməlidir",- deyə o, qeyd edib.

Macarıstanlı nazir həmçinin Belarusla münasibətlərin inkişaf etdirilməsinin vacib olduğunu söyləyərək, bu ölkəyə maliyyə dəstəyi verməyə çağırıb.

"Belarusla ticari və iqtisadi əlaqələrin yaranması Avropa İttifaqının xeyrinə ola bilər",-deyə Pyotr Siyarto sözlərini bitirib.

İlhamə
Ölkə.Az