"Türkiyənin dəstəyə ehtiyacı var"
"Qardaş Türkiyəni İraqa, Əfqanıstana, Suriyaya döndəriblər. Sivil, dünyəvi, tərəqqipərvər və dünyanın ən güclü iyirmi iqtisadiyyatı içində olan Türkiyəni məhz bu halda görmək istəyənlər var. Türkiyədə terrorun kökünü kəsmək üçün barmağını tərpədən kimsələr və ölkələr də yoxdur, deyəsən. Qardaş Türkiyə PKK terroru ilə baş-başa qalıb"
Bunu Ölkə.Az-a Azərbaycan Xalq Cəbhəsi Partiyasının (AXCP) sədri Razi Nurullayev Türkiyədə baş verən terraktlara münasibət bildirərkən deyib. AXCP sədri terror lənətləyərək, hər kəsi qardaş Türkiyəyə dəstək verməyə çağırıb:
"Lənət olsun terrora, onu düşünənlərə və həyata keçirənlərə. Haqq-ədalət axtaran, Quranı əlində bayraq edən, cənnət və Allahın şəfqətindən danışan şəxs necə günahsız insanları partlada bilər? Demək onlar insan deyil, insan cildində şeytandırlar.
Neçə illərdir ki, müşahidə edirəm və görürəm ki, Avropa Birliyi, Amerikada və digər böyük yeddilik ölkələrində terror baş verən zaman dünya çalxalanır, terrora qarşı dünya birləşir və elə həmrəylik nümayiş etdirirlər ki, elə göz yaşı tökürlər ki, Azərbaycan da yasa batır, yüz minlərlə insan terror olan ölkənin bayrağını başına sancaqlayır. Təbii ki, terroru lənətləmək, acını bölüşmək və yardım etmək savabdır, borcdur. Bu gün terrordan dəstəyə ən çox qardaş Türkiyə ehtiyac duyur. Türkiyədə baş verən terroru lənətləyək və onu həyata keçirənlərə lənət oxuyaq.
Başın sağ olsun, Türkiyə!"
