Azərbaycan və ABŞ "Açıq səma" barədə razılığa gəldi
ABŞ və Azərbaycan arasında aviadaşımalar bazarının liberallaşdırılması üzrə “Azərbaycan Hava Yolları” QSC-nin (AZAL) prezidenti Cahangir Əsgərov və ABŞ-ın Azərbaycandakı səfiri Robert Sekuta arasında 6 aprel 2016-cı il tarixdə imzalanmış “Açıq Səma Sazişi” (“Open sky agreement”) bu gün, iyunun 14-də, qüvvəyə minib.
Ölkə.Az-ın məlumatına görə, bu barədə APA ABŞ Dövlət Departamentinin rəsmi internet səhifəsinə istinadən xəbər verir.
Qeyd edək ki, ikitərəfli saziş ABŞ və Azərbaycan arasında hava nəqliyyatının təşkili prosesinin sadələşdirilməsinə imkan verəcək, həmçinin kommersiya reyslərinin sayının artmasına kömək edəcək.
“Açıq səma sazişi” aviaşirkətlərin marşrutlar üzrə kommersiya qərarlarına və qiymət qoyma siyasətinə dövlət müdaxiləsini aradan qaldırmağı nəzərdə tutur. Bu da operatorlara sərnişin və yük daşımaları üzrə daha əlverişli və səmərəli xidmət göstərməyə imkan verir.
