\"Qarabağ münaqişəsi Fələstin problemindən çox fərqlidir\"

Qarabağ münaqişəsi Fələstin məsələsinə bənzəmir.

Ölkə.Az xəbər verir ki, İranın Azərbaycandakı səfiri Möhsün Pakayin ölkəsinin Ermənistanla viza rejimini ləğv etdiyinə, eləcə də münasibətlərin dərinləşməsinə yönəlik addımlar atdığı üçün azərbaycanlı deputatların İranın ünvanına səsləndirdikləri fikirlərə münasibət bildirib. O deyib ki, İranın Azərbaycanın ərazi bütövlüyü ilə bağlı mövqeyi dəyişməz olaraq qalır.

"Biz regionda sabitliyin pozulmasını istəmirik.

Bu, heç kimin xeyrinə deyil. Qarabağ münaqişəsi Fələstin münaqişəsinə bənzəmir. İsrail rejiminin orada törətdiyi qırğınlar və insanlara verilən zülümlər Qarabağda baş verən hadisələrlə müqayisə olunmaz dərəcədədir. İsrail rejimi Fələstin torpaqlarını işğal edib, oradakı əhaliyə işgəncələr verir, zülmə məruz qoyur. Fələstin və Qarabağ məsələsi tamamilə fərqlidir. Biz düşünürük ki, İsrail rejimi saxta rejimdir və bütün dünya üçün təhlükədir. Bu səbəbdən də bu rejim dəyişməli, Fələstin xalqı öz torpaqlarına sahib olmalıdır",- deyə səfir bildirib.

"Başqa məsələ ondan ibarətdir ki, Qarabağ münaqişəsinin həlli üçün ölkə rəhbərləri danışıqlar aparırlar və biz ümid edirik ki, bu danışıqlar bəhrə verəcək. Fələstin məsələsinin isə sülh yolu ilə həll olunacağını görmürük və buna inanmırıq”,- deyə o vurğulayıb.

İlhamə
Ölkə.Az