Qurultay qurtardı, Azərbaycan unuduldu

 

***

 

Deyə bilərsiniz ki, bizi Dünya Azərbaycanlılarının IV Qurultayından o qədər də böyük zaman kəsiyi ayırmır və belədə diasporumuzun fəaliyyətində fundamental dəyişikliklər gözləmək də yersizdir. Tamamilə doğrudur, bir neçə günün içində böyük dəyişikliklərin baş verəcəyini kimsə xəyal etməyib və edə də biməz. Söhbət heç olmasa Qurultayın əsas diqqət yetirdiyi və müəyyənləşdirilmiş yeni vəzifələrə həsr olunmuş ümumi müzakirələrdən gedir. Əslində necə olmalı idi? Çox sadə. Qurutay nümayəndələri yaşadıqları ölkəyə qayıdan kimi digər diaspor təmsilişilərini də bir araya gətirib dövlətin ismarışlarını, müəyyən etdiyi yeni vəzifələri onların da diqqətinə çatdırmalı və heç olmasa növbəti mərhələ üçün nəzərdə tutulan fəaliyyət proqramının konturlarını çızmalı idilər. Bunun üçün də aylar, illər lazımdır? Biz axtardıq, internetdəki axtarış sistemlərinin altını-üstünə çevirdik. Ukrayna Azərbaycanlılarının Birləşmiş Diasporundan(UABD) başqa ikinci bir nümunəyə rast gəlmədik. Qayıdan kimi toplaşıblar, müzakirələr təşkil edib IV Qurultayın müəyyən etdiyi vəzifələrin icrası istiqamətində atacaqları addımlardan danışıblar. Materiallların yayıldığı tarixə baxırıq: Qurultaydan iki-üç gün sonrakı tarixlərdir. Deməli, adıçəkilən diaspor təşkilatımızın işləmək, dövlətə və xalqa xidmət göstərmək istəyi daha güclüdür. 

İndi orataya suallar çıxır: Niyə biz hər dəfə məhz UABD-nin tədbirləri barədə xəbərləri oxuyuruq? Dünya Azərbaycanlılarının IV Qurultayı ancaq onlar üçünmü təşkil olunmuşdu? Məhz onlar üçünmü vəzifələr müəyyən edilib? Hanı digər ölkələrdəki diaspor təşkilatlarımız?  Nədən Qurultaydan sonra onların heç olmasa ayaqüstü və xalaxətri müzakirələri barədə balaca bir xəbərə rast gəlmirik? Qarşılaşdığımız ancaq diaspor təmsilçilərinin sosial şəbəkələrdə paylaşdığı şəkillərdir. Bu adamlar Qurultay başlayandan bu günə qədər ancaq Bakıda çəkdirdikləri şəkilləri yayırlar. Sanki Bakıya ancaq məmurlarla, Diasporla İş üzrə Dövlət Komitəsinin sədri, hörmətli Nazim İbrahimovla selfi çəkdirməyə, ziyafətlərdə iştirak etməyə gəlmişdilər. Bir xanm Qurultay nümayəndəsi var. Bakıda butik qoymayıb, hamısının içində şəkil çəkdirib. Elə bir ticarət və əyləncə mərkəzi yoxdur ki, onun qarşısında poz verməsin. Şəkillərinin ardı-arası kəsilmir. Amma heç olmasa bircə foto  Şəhidlər Xiyabanında çəkilməyib...

 

***

 

Əlbəttə, əyləncə də, gəzmək də, məmurlarla şəkil çəkdirmək də olmalıdır. Lakin əsas vəzifələri kənara qoyub bir turistin getdiyi ölkədən qayıdandan sonra sosial şəbəkələrdəki davranışlarını xatırladan fəaliyyət formalarına üstünlük vermək dövlət maraqlarına xidmət anlamına gəlmir axı... Olduqca həssas bir dönəmə qədəm qoymuşuq. Qarabağ problemi ətrafında gərgin vəziyyət yaranıb. Ölkəmizə qarşı ədalətsiz və qərəzli çıxışların şahidi oluruq. Ermənilər aprelin əvvəlində cəbhədə yaşadıqları məğlubiyyətdən sonra öz yalanlarını daha artıq həyasızlıqla yaymağa və buna dünyanı daha ciddi cəhdlə inandırmağa çalışırlar.Ümumiyyətlə, görünən odur ki, dörd günlük müharibədən sonra Qarabağ məsələsi yeni və həlledici mərhələyə qədəm qoyub və deməli, indi bizim diaspor təmsilçilərimizin fəaliyyəti də özünün əyləncə mahiyyətini dəyişməli və bütün çalışmalar dövlətin maraqları və dövlətin müəyyən etdiyi hədəflərə doğru istiqamət götürməlidir. Vaxt bizim əleyhimizə işləyir. Gözləmək, dünənə qədərki astagəlliyimizi davam etdirmək bizə uğur vəd edə bilməz. Soruşuruq: Niyə dövlətimizin bu qədər güclənməsinə, iqtisadiyyatmızın inkişaf etməsinə, qüdrətli Ordumuzun olmasına və bir çox istiqamətlər üzrə əldə olunan uğurlarımızla başqa ölkələrə də nümunə göstərməyimizə rəğmən diasporumuz erməni yalanlarına qarşı effektli mübarizəni təşkil edə bilmir? Niyə bütün digər sahələrdə olduğu kimi, informasiya müharibəsi və təbliğat məsələlərində də ermənilər üzərində tam üstünlük əldə edə bilmirik? Necə olur ki, ermənilər dünyanı öz yalanlarına inandıra bilirlər, amma biz öz haqlı və ədalətli mövqeyimizə beynəlxalq dəstək qazanmaqda çətinlik çəkirik?.. 

Diaspor təmsilçiləri hər dəfə qurultaylarda çıxış edərkən dillərindəki pafos sərhəd tanımır, “Vətən”, “Dövlət” deyib az qala göz yaşı tökürlər. Yaşadıqları ölkələrə qayıdandan sonra isə vətən də yaddan çıxır, dövlət də. Belə olmasaydı, məsələn Dünya Azərbaycanlılarının IV Qurultayından sonra diasporumuzun yeni bir ruh və daha böyük həvəslə işləməyə hazır olduğunu göstərən balaca bir işartıya rast gələrdik. Əslində isə Qurultaydan sonra bizimkilərin xarici mediada çıxışlarını oxumalıydıq. Məntiqlə onlar qayıdan kimi yaşadıqları ölkənin hansısa KİV orqanında müsahibələr təşkil etməli, vətəndə gördükləri və eşitdikləri barədə yerli ictimaiyyətə məlumat verməli, təsuratlarını bölüşməliydilər...  Deyə bilərsiz ki, bu işlər də koordinasiya olunmalıdır. Bəli, razıyıq, deməli, iradlarımız həm də Diasporla iş üzrə Dövlət Komitəsinədir. Qurultaydan sonrakı günlər üçün ayrıca fəaliyyət proqramı hazırlanmalı və həmin bu YÜKSƏK SƏVİYYƏLİ tədbir barədə beynəxlaq miqyasda xüsusi təbliğat işləri aparılmalı idi. Qurultaylar niyə keçirilir? Əlbəttə ki, dünyada Azərbaycanın təbliğatı işinin sürətləndirilməsi, vahid idarəetmə mexanizmlərinin təkmilləşdirilməsi, birgə və daha orijinal fəaliyyət formalarının seçilməsi üçün. Bütün bunların ərsəyə gəlməsi üçün isə sözsüz ki, müvafiq dövlət qurumunun üzərinə böyük məsuliyyət düşür. Deməli, bizim bu yazımızın qinaq ruhu təxminən, “Ay qızım sənə deyirəm, ay gəlinim, sən eşit” kontekstində qəbul olunmalıdır...

 

***

 

Dünən xəbər axtarışında olarkən qarşılaşdığımız bir informasiya diqqətimizi çəkdi.“Dünya Azərbaycanlılarının Beynəlxalq Koordinasiya Mərkəzi (DABKM) yaradıldı”. Başllığı oxuyan kimi, dedik şükür, deyəsən buzlar əriməyə, bizimkilər IV Qurultaydan nəticə çıxarmağa başlayır. Xəbəri oxuyuruq: “Ukrayna Azərbaycanlıları Birləşmiş Diasporunun İdarə Heyəti Bakıda keçirilən Dünya Azərbaycanlılarının 4-cü qurultayından sonra diaspor hərəkatının inkişafına töhfə verəcək yeni qurumun yaradıldığını elan edib. Mərkəzi ofisi Kiyev şəhərində yerləşəcək Dünya Azərbaycanlılarının Beynəlxalq Koordinasiya Mərkəzi (DABKM) adlanan yeni qurum artıq Ukrayna Ədliyyə Nazirliyində qeydiyyatdan keçib. Layihənin ideya müəllifi və rəhbəri Ukrayna Azərbaycanlıları Birləşmiş Diasporunun (UABD) sədri Hikmət Cavadovdur. Koordinasiya Mərkəzi ilk növbədə “informasiyanı və informasiyadan qorunmaq” prinsipini əsas götürərək bir alət kimi mövcud olan informasiya müharibəsində Azərbaycanın haqlı mövqeyini dünya ictimaiyyətinə çatdırmağa, ictimai fikri ölkəmizin xeyrinə dəyişməyə çalışacaq: “Düşünürük ki, hazırda bizim buna kadr və texniki potensialımız var. Sadəcə dünyada yaşayan azərbaycanlılardan ibarət çevik qüvvələri daha operativ koordinasiya etməklə məqsədimizə qısa zaman kəsiyində nail ola bilərik.”

 

***

 

Yenə Kiyev, yenə Ukrayna Azərbaycanlılarının Birləşmiş Diasporu və yenə Hikmət Cavadov... Niyə təkcə UABD? Bizim başqa diaspor təşkilatlarımız yoxdurmu? Yeni təşəbbüs və ideyalarla başqaları da çıxış edə bilməzmi? Hanı bizim Avropadakı diaspor təşkilatlarımız? Harada itib-batıblar? Qurutaydan sonra bu adamlardan niyə xəbər yoxdur? Axı “Tərəqqi” medalı təkcə UABD təmsilçilərinə verilməyib. Hanı “Vətənə xidmət” ordeni alanlar? Bu ordenin ağırlığından doğan məsuliyyətin altına çiyin vermiş heç kəsi görmürük. 15 gündür ki, axtarırıq, amma tapmırıq. Görünür, bir çoxlarının vətən, millət sevgisi ancaq qurultaylarda alovlanır, tədbir başa catan kimi isə növbətisinə qədər söndürülür. Nömrələri kimi...

 

UABD-nin yeni təşəbbüsü barədə xəbəri oxumaqda davam edirik: “Azərbaycan prezidenti İlham Əliyevin Dünya Azərbaycanlılarının Bakıda keçirilən sonuncu qurultayında səsləndirdiyi “mən çox istəyirəm ki, xaricdə fəaliyyət göstərən diaspor təşkilatları bir nöqtəyə vursunlar, birləşsinlər. Belə olan halda onların gücü də, ictimaiyyət tərəfindən onlara qarşı hörmət də artacaq” – kimi dəyərli fikirlərindən qaynaqlanan bu ideya ətrafında dünyanın bir çox diaspor təşkilatlarının birləşəcəyinə ümid edirik. Cənab Prezidentin qeyd etdiyi kimi, birlik əsas məsələdir. Dünya Azərbaycanlılarının Beynəlxalq Koordinasiya Mərkəzi bu birliyə nail olmaqla qurultayda səslənən digər problemlərin də qısa zaman ərzində həllinə nail olmaq əzmindədir. Təbii ki, yenə də Prezident İlham Əliyevin söylədiyi kimi:  “...Birlik hesabına. Əgər, diaspor təşkilatları arasında vahid koordinasiya və qarşılıqlı dəstək, anlaşma varsa, deməli, bu məqsədə çatmaq üçün daha da asan yollar müəyyən ediləcək”. 

 

***

 

Əlbəttə, cənab Prezidentin Qurultaydakı tarixi çıxışı dünya azərbaycanlılarından məhz belə bir fəaliyyət nümunəsi tələb edir. Prezident ən xərda detalları belə nəzərə alaraq diasporumuzun qarşısında konkret vəzifələr qoydu və günümüzün reallıqlarından çıxış edərək diasporun diqqət yetirməli olduğu istiqamətləri açıq və aydın şəkildə elan etdi. UABD də məhz bu çıxışdan, bu çağırışdan ruhlanaraq HAMININ BİR NÖQTƏYƏ vurmasını təmin edəcək mərkəzin yaradılmasına qərar verib. Ehtiyac duyulan addmdır və Azərbaycan adına qurulan nə varsa, hamısı alqışlanandır. Amma dövlət bu kimi yeni təşəbbüsləri bütün diaspor təşkilatlarından gözləyir. Biz təkcə bir diaspor təşkilatımızdan deyil, azərbaycanlıların xaricdə qurduğu bütün diaspor qurumlarından xəbərlər gözləyirik. Ortada Prezidentin iradəsi və dövlətin dəstəyi varkən kimi və nəyi gözləyirlər? İlham Əliyev kimi güvənc yeri, Azərbaycan Dövləti kimi arxa-dayağı olam diaspor üçün daha nə lazımdır ki, erməni təbliğat maşınını və Azərbaycana qarşı työnəlmiş qərəzli kampaniyaları darmadağın etsin? 

 

***

 

Ümid edirik ki, qarşıdakı günlərdə Dünya Azərbaycanlılarının IV Qurultayına nümayəndə kimi qatılmış soydaşlarımızın səsini eşidəcək və Bakıda müəyyənləşdirilmiş hədəflərə doğru hərəkətə keçmələrini müşahidə edəcəyik. 

 

Müharibə hələ birtməyib. Amma üstünlük bizə keçib. Təkcə diaspor cəbhəsindəki vəziyyət xeyrimizə deyil...