Azərbaycanla MDB ölkələri arasında ticarət dövriyyəsinin mənfi saldosu azalıb
Dövlət Gömrük Komitəsinin məlumatına görə, cari ilin yanvar-may aylarında Azərbaycandan MDB ölkələrinə, ümumilikdə, 231 milyon 909 min ABŞ dolları həcmində məhsul ixrac olunub.
Ölkə.Az Report-a istinadən xəbər verir ki, ixrac ötən ilin müvafiq dövrü ilə müqayisədə 35,6% artıb.
İdxal isə əksinə, 11% azalaraq cari ilin ilk beş ayı ərzində 786 milyon 497 min dollara enib. Beləliklə, MDB ölkələri ilə ticarət dövriyyəsində 554 milyon 588 min dollarlıq mənfi saldo yaranıb. Bu da ötən ilin eyni dövrü ilə müqayisədə 22,2% azalma deməkdir.
Hesabata əsasən, ölkə üzrə cəmi ixracın 7,6%-i, idxalın isə 23,6%-i məhz MDB ölkələrinin payına düşüb.
MDB ölkələrindən Belarus, Qazaxıstan, Qırğızıstan, Moldova, Tackisitan, Türkmənistan və Ukraynaya ixrac artıb, Özbəkistan və Rusiyaya isə azalıb. İdxalda isə Qazaxıstan, Qırğızıstan üzrə artım, digərlərində isə azalma qeydə alınıb.
Azərbaycanın MDB-də əsas ticarət tərəfədaşı olan Rusiya ticarət dövriyyəsinin həcminə görə, ölkələrin ümumi siyahısında İtaliyadan sonra ikincidir. Ölkə üzrə cəmi ticarətin 11,6%-i və ya 739 milyon 788 min dolları Rusiyanın payına düşüb.
Xatırladaq ki, Rusiya ixracda 8-ci, idxalda isə 1-ci olub. İxracın 130 milyon189 min dolları və ya 4,27%-i, idxalın isə 609 milyon 599 min dolları və ya 18,3%-i məhz Rusiyanın payına düşüb.
