\"Bunu Putinin qələbəsi adlandırmaq səfehlikdir\"

Britaniya Avropa İttifaqından çıxır.

Böyük Britaniyada keçirilən referendumun nəticələrinə görə, əhalinin 51,8%-i Aİ -dən çıxmağa səs verib.

Bir çox politoloqlar iddia edirdi ki, Böyük Britaniyanın Avropa İttifaqından çıxması Avropa İttifaqının dağılması ilə nəticələnəcək.

Böyük Britaniyanın Avropa İttifaqından çıxması və bunun Avropa və Britaniyanın özü üçün nə ilə nəticələnəcəyi barədə politoloq Zərdüşt Əlizadə Ölkə.Az-a danışıb:

"Avropa İttifaqını Böyük Britaniya yaratmayıb. Böyük Britaniya 1973-cü ildə Avropa İttifaqına daxil olub. Özü üçün əlahiddə imtiyazlar, şərtlər əldə edib. İndi isə çıxmağa qərar verib.

Böyük Britaniyanın Aİ-dən çıxmasının iqtisadi nəticəsi o olacaq ki, əvvəl onu Avropa iqtisadiyyatının tərkib hissəsi kimi dünya miqyasında bütün Avropa müdafiə edirdisə, indi özü öz iqtisadi təhlükəsizliyini müdafiə etməli olacaq. 500 milyonluq Avropa bazarına Böyük Britaniya malları çox sadə, heç bir bir maneəsiz daxil ola bilirdisə, indi Böyük Britaniya şirkətləri 28 ölkə ilə danışıqlar aparıb, hərəsi ilə ayrılıqda öz münasibətlərini müəyyənləşdirməli olacaq. Burada fəlakət yoxdur. Hər halda müəyyən vaxt aparacaq və bəzi problemlər yaranacaq. Londonun dünya maliyyə mərkəzi kimi qalması əlavə çətinliklər gətirəcək. Siyasi cəhətdən isə bu ona gətirəcək ki, Şotlandiya yenidən referendum keçirib Böyük Britaniyadan ayrılmaq məsələsini bir daha əhalinin səsverməsinə çıxaracaq. Ola bilsin ki, Şotlandiya Böyük Britaniyanın tərkibindən çıxsın.

Avropa üçün Böyük Britaniyanın İttifaqdan çıxması xoş hadisə deyil. Çünki bundan əvvəl Avropa İttifaqı layihəsi çox cazibədar görünürdü. Həyat göstərdi ki, Aİ-nin özünün də ciddi problemləri var. Bu problemləri heç də hər zaman demokratik müzakirələr vasitəsi ilə həll etmək mümkün deyil. Ona görə də, Avropa ölkələri Böyük Britaniyanın bu addımını çox məyusluqla qarşıladılar.

Avropa İttifaqı dağılmayacaq. Avropa İttifaqı davam edəcək. Bütövlükdə Avropa iqtisadiyyatı möhkəm əsaslar üzərində qurulub və fəaliyyət göstərir".

ABŞ-ın Rusiyadakı keçmiş səfiri Maykl Makfol Böyük Britaniyanın Avropa İttifaqından çıxması barədə "bu hadisə Vladimir Putinin xarici siyasətinin böyük qələbəsidir" fikirini səsləndirməsinə isə politoloq belə cavab verdi:

"Bunu Putinin qələbəsi adlandırmaq tamamilə səfeh bir sözdür. Fərz edək ki, evimizdə yanğın baş verib. Bu zaman qonşuda da yanğın başlayır. Bu bizim qələbəmizdir? Avropada problemlər varsa, problemlər içərisində boğulan, çabalayan, yavaş-yavaş parçalanan Rusiyanın qələbəsi deyil. Başqasının uğursuzluğuna sevinmək yalnız səfeh adamların taleyinə yazılıb".

Qeyd edək ki, Avropa Birliyini 1957-ci ildə Belçika, Fransa, Almaniya, İtaliya, Lüksemburq və Hollandiya qurub. Böyük Britaniya isə 1973-cü ildə Avropa Birliyinə daxil olub.

Səxavət Məmməd
Ölkə.Az