Türkiyədə törədilən terror aktının arxasında ən güclü kəşfiyyat idarələri dayanır

İstanbulun "Atatürk" hava limanında terror aktı nəticəsində 36 nəfər ölüb, 147 nəfər yaralanıb

Terror aktının İsrail-Türkiyə, Rusiya-Türkiyə münasibətlərinin normallaşdırıldığı vaxtla üst-üstə düşməsi heç də təsadüfi sayıla bilməz. Terror aktına görə məsuliyyəti isə PKK yox, İŞİD terror təşkilatı öz üzərinə götürüb.

Türkiyədə baş verən terror aktı barədə politoloq Zərdüşt Əlizadə Ölkə.Az-a danışıb:

"Türkiyə artıq terror məkanına çevrilib. Türkiyənin həm şərqində, həm də iri şəhərlərində mütəmadi olaraq terror aktları törədilir. Bu onu göstərir ki, Türkiyənin dövlət quruluşunda müəyyən bir nasazlıq var, yəni, dövlət terrorun qarşısını almaqda acizdir. Bu o deməkdir ki, ölkədə terroru doğuran ictimai, siyasi, iqtisadi səbəblər var.

Baxmayaraq ki,Türkiyə NATO-nun üzvüdür, böyük orduya, güclü iqtisadiyyata sahibdir və kifayət qədər oturuşmuş dövlətdir, baş verən terror aktları onu göstərir ki, Türkiyəni dağıtmaqda maraqlı olan xarici qüvvələr mövcuddur. Bu qüvvələr fəaliyyətlərini davam etdirirlər.

Bu terror aktında bir ismarıc var, "biz sizi dağıdacağıq". Türkiyə gərək toparlanıb, özünü müdafiə edə bilsin. İstanbulun Atatürk hava limanında baş verən terror aktının arxasında dünyanın ən güclü kəşfiyyat idarələri və iqtisadi, siyasi qurumları dura bilər. Türkiyə adi bir dövlət deyil ki, onu dağıtmağa hansısa xırda bir dövlət girişsin. Bunun arxasında qüdrətli dövlətlər və təşkilatlar dayanır".

Qeyd edək ki, 2016-cı ildə hər ay Türkiyədə terror aktı baş verib.

Səxavət Məmməd
Ölkə.Az