"Erməni faktorundan Türkiyəyə qarşı həmişə istifadə edilib və ediləcək də"

Türkiyə-İsrail münasibətlərinin düzəldiyi bir vaxtda “erməni soyqırımı”nın İsrail parlamentinin gündəminə gətirilməsinin iki dövlət arasında yenicə düzəlməkdə olan münasibətlərə necə təsir edəcəyi maraqla gözlənilir. Türkiyə tərəfi İsrailə qarşı hansı addımı atacaq? Münasibətlər yenidən pisləşəcəkmi?

Bununla bağlı politoloq Zərdüşt Əlizadə Ölkə.Az-a danışıb:

"Uydurma “erməni soyqırımı”nın İsrail Knessetinin gündəliyinə daxil edilməsi çoxdan planlaşdırılıb. İsrail bunu ona görə edir ki, Türkiyəni nəzarət altında saxlasın. İsrail dolayısı ilə deyir ki, bu silahdan hər an sizə qarşı istifadə edə bilərik.

İsrail parlamentində bu məsələ müzakirə olunsa da, heç vaxt İsrail “erməni soyqırımı”nı tanımayacaq. Soyqırım siyasi, iqtisadi, mənəvi baxımdan çox ciddi bir layihədir. Heç vaxt yəhudilər özlərinə sığışdırmazlar ki, genosid məsələsində hansısa bir millət gəlib onlara tay olsun. Onlar genosidə məruz qalmış xalq kimi öz birinciliklərini saxlamaq istəyirlər.

"Erməni xalqının liderləri öz millətinə siyasi oyunlara alət olmağı rəva biliblər. Ermənilərdən həmişə başqaları istifadə edib".

Qeyd edək ki, Türkiyə İsrail münasibətləri yaxın günlərdə iki dövlət arasında imzalanan saziş nəticəsində düzəlməyə başladı. İsrail Türkiyəyə məxsus "Mavi Mərmərə" gəmisində öldürülən Türkiyə vətəndaşlarına görə üzr istədi və ölənlərin ailəsinə kompensasiya ödəyəcəyini bildirdi. Sazişə əsasən, Türkiyə rahat şəkildə Fələstinə humanitar yardım göstərə biləcək.

Səxavət Məmməd
Ölkə.Az