\"NATO-nun dünyada ən çox güvəndiyi və əhəmiyyət verdiyi ordu Türkiyə ordusudur\"

15 iyul çevrilişindən sonra əsgərlərə qarşı alçaldıcı hərəkətlər türk ordusunun imicinə ləkə vurdu.

Buna baxmayaraq NATO-nun baş katibi Yens Stoltenberq bildirib ki, Türkiyə ordusu əvvəlki kimi, güclüdür.

Bəzi ekspertlər iddia edirdi ki, Türkiyə NATO-nun tərkibindən çıxa bilər. NATO-nun baş katibi Yens Stoltenberq buna münasibət bildirərək deyib ki, Türkiyənin NATO tərkibində qalıb-qalmaması məsələsi gündəmdə deyil. Türkiyə NATO-nun tərəfdaşı olmaqda davam edir. Bu çox vacib bir məsələdir. Çünki Türkiyə İraq və Suriya kimi “qaynar nöqtələrin” sərhədində yerləşir.

Baş verənlərlə bağlı hərbi ekspert Üzeyir Cəfərov fikirlərini Ölkə.Az-la bölüşüb:

"NATO-nun baş katibi Stoltenberqin fikirlərini dəstəkləyirəm. Türkiyə silahlı qüvvələri nə olursa olsun, kimin nə deməsindən asılı olmayaraq Türk dünyasının qürurudur. Faktiki olaraq bir xoşagəlməz hadisə Türkiyə silahlı qüvvələri haqqında fikri dəyişdirməməlidir.

Hərbi çevrilişə cəhdlə bağlı həbs olunanların heç də hamısı həbs cəzasına məruz qalmayacaq. Araşdırmalar aparıldıqca günahsız insanlar azad olunacaq. Türkiyə silahlı qüvvələri yenə əvvəlki iş rejiminə qayıdacaq. 15 iyul hadisələri bütövlükdə Türk ordusunun həyata keçirmək istədiyi bir çevriliş deyildi. Əgər bütövlükdə Türkiyə silahlı qüvvələri hərbi çevriliş etmək istəsəydi, xalq onun qarşısını ala bilməzdi. Baş verən hadisə bir qrup hərbçinin çevrilişə cəhdi idi. Türkiyə silahlı qüvvələri xalqa qarşı ağır silahlardan atəş açmadı.

NATO-nun dünyada ən çox güvəndiyi və əhəmiyyət verdiyi ordu Türkiyə ordusudur. Türkiyə ordusu nə olursa olsun, bu imici qoruyub saxlayacaq. Baxmayaraq ki, Türkiyədə hərbçilərin həbsi davam edir, ancaq eyni zamanda Suriyada və İraqda PKK-ya qarşı türk əsgəri mübarizə aparmaqdadır.

Həm Azərbaycan, həm də Türkiyə mətbuatından istəyim ondan ibarətdir ki, gəlin türk ordusunu qoruyaq. Nə qarnıyekə polislər, nə də əməliyyatçılar Türkiyəni yad ellilərdən qoruyan deyil. Güc peşakar və təcrübəli hərbçilərin üzərinə düşür. İnanıram ki, vətən xaini damğası ilə həbs edilən general və admiralların bir çoxu bəraət alıb həbsdən çıxacaqlar. Türkiyə ordusunun güclü olması bizim üçün də vacibdir. Türkiyə ordusu zəifləyəcəyi təqdirdə regionda separatçılar baş qaldıracaq. Türk əsgərinin əvvəlki adını və hörmətini özünə qaytarmalıyıq, bu işdə hər iki dövlətin mətbuatının üzərinə çox böyük yük düşür".

Səxavət Məmməd
Ölkə.Az