\"Bu, Ərdoğanın siyasi rəqibləri ilə apardığı mübarizədə ciddi uğurudur\"

Ankarada prezident sarayında Rəcəb Tayyib Ərdoğanın dəvəti ilə CHP, MHP və AKP liderlərinin görüşü keçirilir

Görüşdə prezident Ərdoğanla yanaşı AKP sədri Binəli Yıldırım, CHP lideri Kamal Kılıcdaroğlu, MHP sədri Dövlət Baxçalı iştirak edir. Maraqlısı ondadır ki, parlamentdə təmsil olunan HDP görüşə dəvət edilməyib.

Prezident sarayında baş tutan bu görüşü bəzi ekspertlər Ərdoğanın müxalifət üzərində tam qələbəsi kimi də qələmə verirlər.

Ərdoğanın CHP və MHP liderləri ilə görüşü barədə fikirlərini politoloq Elşən Manafov Ölkə.Az-la bölüşüb:

"Türkiyədə baş verən hadisələrin fonunda Ərdoğanın ölkə parlamentində təmsil olunmuş siyasi partiyaların liderləri ilə keçirdiyi görüş başladı. Hakimiyyət çevrilişinə cəhd olayları yaşanarkən əslində Ərdoğanın ən qatı opponentləri belə onu müdafiə etdi və bəyan etdilər ki, ölkədə konistusion quruluşun qeyri-qanuni, hərbi çevriliş yolu ilə həyata keçirilməsi yolverilməzdir. Bu hal isə Ərdoğan hökumətinin legitimliyinin siyasi apponentləri tərəfindən qəbul olunması anlamına gəlir.

Ərdoğanın bu görüşə HDP liderini dəvət etməməsi anlaşılan bir addımdır. Məhz Ərdoğan ölkə parlamentinə müraciət edərək HDP-nin parlamentdə təmsil edilmiş üzvlərinin deputatlıq toxunulmazlığı ilə bağlı məsələ qaldırmışdı. Ölkə parlamenti Ərdoğanın təklifini bəyəndi və həmin deputatların deputat toxunulmazlığı ləğv edilmişdi. Digər bir məsələ ondan ibarətdir ki, həmin hadisələr zamanı HDP-nin mövqeyi çox fərqli oldu. CHP və MHP-dən fərqli olaraq HDP-nin hərbi çevrilişi pisləməsi barədə kəskin bəyanatlar görmədik. Bu partiyanın ölkənin mövcud konstitusion quruluşuna qarşı apardığı mübarizə göz qabağındadır. HDP tərəfindən Türkiyənin ərazi bütövlüyü üçün müəyyən təhlükələr olsa da, Rusiya tərəfindən həmin partiyaya maliyyə və hərbi dəstəyin olmaması şəraitində Ərdoğanın HDP liderini görüşə çağırmasına ehtiyac qalmayıb.

Türkiyədə yaşanan hadisələr zamanı Rusiya iqtidarı Qərbdən fərqli olaraq Ərdoğanı birmənalı şəkildə dəstəklədi. İranın "Fars" agentliyinin yaydığı məlumatdan çıxış etsək, əslində Türkiyədə hakimiyyət çevrilişinin ola biləcəyi ilə bağlı xəbəri Ərdoğana məhz rəsmi Kreml çatdırıb. Maraqlıdır ki, rəsmi Moskva bu xəbərləri təkzib etmədi.

Türkiyə Rusiya münasibətlərinin loyallaşması, bu münasibətlərin normallaşmasından sonra HDP Ərdoğan iqtidarı üçün heç bir təhlükə törətməyəcək. Hərçənd ki, HDP-nin Qərbdən də müəyyən dəstəyi var. Qərbin Ərdoğan iqtidarına münasibəti bəllidir.

Bundan sonra ölkədə fövqəladə vəziyyətin tətbiqi şəraitində Ərdoğan məhkəmə hakimiyyətinə və KİV-lərə münasibətdə bir qədər ehtiyatlı davranmalıdır. KİV-lərə qarşı edilən hücum, 100-dən çox jurnalistin bu hadisələrlə bağlı istintaqa cəlb edilməsi artıq Qərbdə ciddi ajiotaja səbəb olub. Bu, Ərdoğan iqtidarının Qərbdəki əsas dəstəkçisi, NATO ilə münasibətlərin pisləşməsinə səbəb ola bilər.

Ərdoğanın siyasi opponentləri ilə apardığı danışıqlar milli barışığa, milli həmrəyliyə istiqamətlənib. Eyni zamanda bu danışıqların baş tutması Ərdoğan iqtidarının legitimliyinin bir daha sübutudur. Ancaq bunu Ərdoğan iqtidarının tam qələbəsi kimi də təqdim etmək olmazdı. Bu danışıqlar zamanı Ərdoğanın prezidentlik üsul-idarəsi ilə bağlı verdiyi təklifin siyasi rəqibləri tərəfindən qəbul olunub-olunmaması maraqla gözlənilir. CHP-nin bu təkliflərə qarşı çox kəskin mövqeyi var. Danışıqlardan sonra fikir söyləmək olar. Hər halda bu görüş siyasi opponentləri ilə apardığı mübarizədə əldə etdiyi ciddi uğurlardan biridir".

Səxavət Məmməd
Ölkə.Az