"Misirin FETÖ-nü terrorçu təşkilat kimi tanımaması ABŞ-ın sifarişidir"

İslam Əməkdaşlıq Təşkilatı Fətullah Gülənin şəbəkəsini terrorçu təşkilat kimi tanıdı

İslam Əməkdaşlıq Təşkilatının 57 üzvündən yalnız Misir Fətullah Gülən təşkilatını terrorçu təşkilat kimi tanımadı.

İslam Əməkdaşlıq Təşkilatının bu addımı atması Türkiyənin İslam dövlətlərinə təsir gücünün göstəricisidir. Misirin Fətullah Gülən təşkilatını terrorçu təşkilat kimi tanımaması isə normal qarşılanır. Səbəb isə ABŞ-ın təsiridir. İddia olunur ki, Fətullah Gülən üçüncü ölkədən sığınacaq istəsə, ona məhz Misir sığınacaq verəcək.

Bu məsələ ətrafında baş verənlərlə bağlı politoloq Elşən Manafov Ölkə.Az-a danışıb:

"İslam Əməkdaşlıq Təşkilatının Fəthullah Gülənin şəbəkəsini terrorçu təşkilat kimi tanıması göstərir ki, Gülənçilər təkcə Türkiyə üçün deyil, region üçün böyük təhlükə təşkil edirmiş. Güman edirəm ki, Fətullah Gülən təşkilatının İslam Əməkdaşlıq Təşkilatı tərəfindən terrorçu qruplaşma kimi tanınması bütün hallarda Türkiyə diplomatiyasının Gülənçilərə qarşı növbəti uğurudur.

Maraqlısı ondadır ki, ABŞ Misirin özündə bəzi təşkilatları zaman-zaman terrorçu təşkilat kimi tanıyıb. "Müsəlman Qardaşları" təşkilatına qarşı ABŞ-ın fikri həmişə birmənalı olub. 1980-ci ildə Ənvər Sədatı qətlə yetirən bu təşkilat sonradan Məhəmməd Mursini hakimiyyətə gətirdi. Misirin öz əhalisi tərəfindən "Müsəlman Qardaşları"na qarşı münasibət xoş məramlı idi. Məhz Misir əhalisinin seçimi nəticəsində Məhəmməd Mursi hakimiyyətə gəlmişdi. Camal Əbdül Nasirdən sonra ilk dəfə mülki şəxs Misir prezidenti olurdu. Məhz bu amil uzun müddət hakimiyyətdə olmuş Misir hərbçiləri tərəfindən həzm edilə bilmədi. Maraqlısı ondadır ki, Misir hərbi elitasının mütləq əksəriyyəti ABŞ-la birbaşa bağlı olub. Ona görə də, güman edirəm ki, Misirdə "Müsəlman Qardaşları"nın hakimiyyətdən devrilməsini qınamayan, bunu dövlət çevrilişinə cəhd kimi dəyərləndirməyən ABŞ təbii ki, Misirdə öz maraqlarından çıxış etdi. Misirdə hərbçilərin hakimiyyətə gəlməsi ilə, ABŞ ən qüdrətli ərəb ölkəsinə təsir imkanını öz əlində saxlamış oldu.

Misirin Fəthullah Gülən şəbəkəsini terrorçu təşkilat kimi tanımaması daha çox ABŞ-ın sifarişi ilə bağlı olan məsələdir. Fətullah Gülənin ABŞ-a sığınması, Ərdoğan iqtidarının israrlı tələblərinə baxmayaraq Gülənçilərin liderinin Türkiyəyə təhvil verilməməsi artıq Türkiyə hakimiyyətinin özündə narahatçılığa səbəb olub. İki gün əvvəl Türkiyənin baş naziri Binali Yıldırım açıqlamasında bildirdi ki, Türkiyə ABŞ-la münasibətinə yenidən baxmaq məcburiyyətində qalacaq. İndiyənə qədər bu münasibətlər strateji tərəfdaşlıq, əməkdaşlıq ampulasında olub. Türkiyə NATO-nun üzvüdür. Bununla belə ABŞ-ın Türkiyəyə qarşı ikili standartlardan çıxış etməsi, Fətullah Gülənin paralel dövlətçilik ideyasını bilavasitə dəstəkləməsi belə bir fikri səsləndirməyə əsas verir ki, ABŞ Türkiyəyə münasibətdə zamanında Misirdə həyata keçirilən ssenarini həyata keçirmək fikrində və əzmində olub. Məlum oldu ki, "Müsəlman Qardaşları"nın hakimiyyətdən devrilməsi və hərbçilərin hakimiyyətə gəlməsi bu və ya digər mənada Qərbin xüsusi xidmət orqanlarının dəstəyi şəraitində baş verdi. Əslində ABŞ ən güclü ərəb ölkəsində öz maraqlarını qorudu və oraya təsir imkanlarını saxladı.

Heç şübhəsiz ki, İslam Əməkdaşlıq Təşkilatında Fəthullah Gülən şəbəkəsinin terrorçu olması barədə səs vermədə Misir təmsilçisinin bu cür hərəkət etməsi Misir hərbi elitasının və bilavasitə ABŞ-ın sifarişi ilə olub. Bu onu göstərir ki, əslində beynəlxalq terrorun qlobal mahiyyət kəsb etdiyini anlayan qüvvələr, eyni zamanda beynəlxalq terrorizmə dəstək verən qüvvələr arxasında məhz ABŞ-ın olması faktorunu deməkdə nə qədər haqlıdırlar. ABŞ-ın İŞİD-ə qarşı mübarizəsi də ikili standartlar təsiri bağışlayır. Son zamanlar İŞİD-in Qərb ölkələrini hədəf alması da İŞİD üçün ABŞ tərəfindən müəyyən edilmiş hədəflərin dəyişməsi demək deyil. Sadəcə olaraq İŞİD ona ayrılan maliyyənin yenidən qaytarılması üçün Qərbi ciddi təzyiq altında saxlayır. İŞİD-in hərəkətlərinə diqqət yetirdikdə bəlli olur ki, İŞİD İsrailə qarşı heç bir addım atmır. Əgər İŞİD İslam uğrunda mübarizə aparırsa, müsəlman ölkələrini ciddi təzyiq və təhdid altında saxlayan İsrailə qarşı addımlar atmırsa, bu onu sübut edir ki, İŞİD-də, Gülənçilər də, Misirdəki hərbçilər də ABŞ tərəfindən bu və ya digər tərəfdən maliyyə, hərbi və birbaşa siyasi dəstəyə malikdirdilər.

Türkiyədəki hakimiyyət çevrilişinin arxasında ABŞ-a aid qüvvələrin olması istisna deyil. Türkiyə-Rusiya münasibətlərində problemlərin aradan qaldırılması istiqamətində Ərdoğan iqtidarı addımlar atarkən bu Qərbdə xüsusi qısqanclıq, narahatlıq doğurdu".

Səxavət Məmməd
Ölkə.Az