"Ermənistanda baş verənlər klanlararası savaş idi"

Ermənistanda qiyamçılar təslim oldu

Ermənistan polisinin patrul-mühafizə alayının Erebuni rayonunda yerləşən binasını zəbt edən silahlı qrup təslim olub. Bundan sonra qiyamçı qrupun rəhbərlərindən biri Varujan Avetisyan deyib ki, təslim olmaq qərarı verdik, biz Ermənistanda xalq hərəkatına təkan verdik.

Ermənistanda baş verən qiyamdan sonra Ermənistan müxalifətinin bir hissəsi və bir qrup ermənilər aksiyalara başladı, ancaq polis həmin aksiyaları asanlıqla dağıtdı. Ümumiyyətlə qiyamçıların arxasında nə xalq, nə də müxalifət durmadı.

Ermənistanda baş verənlərlə bağlı politoloq Elşən Manafov fikirlərini Ölkə.Az-la bölüşüb:

"Ermənistanda baş verən hadisələrə məhz klanlararası savaş konteksində yanaşmaq lazımdır. Ermənistan hakimiyyəti özü monalit bir hakimiyyət deyil. Düzdür, xarici faktorlardan Ermənistanın asılılığı kifayət qədər çoxdur, ancaq Qərbin Ermənistan iqtidarına təsir imkanları Rusiya qədər deyil. Ermənistan parlamentində vəziyyət bir sıra dövlətlərdən kifayət qədər fərqlidir. Daşnaksutyun kimi radikal bir partiyanın Ermənistan parlamentində təmsilçiləri var.

Hadisələrə klanlararası savaş kimi yanaşmaq lazımdır. Sarkisyan iqtidarının daxilində də mövcud vəziyyətdən narazı olan və əldə etdiyi maliyyə ressuslarını genişləndirmək imkanında olan müəyyən dairələr var. Güman edirəm ki, Ermənistanda baş verənlər bir tərəfdən də hüquq-mühafizə orqanlarının içərisində baş verənlərlə əlaqədar idi. Bu hadisələrə əhalinin və ordunun böyük əksəriyyəti izləmə mövqeyində qalmışdı. Qiyamçılar hadisələrə məhz siyasi don geyindirmək adı altında Ermənistan müxalifətinin həbsdə olan bəzi şəxlərinin azad edilməsini şərt kimi qoymuşdu. Bu da Ermənistan müxalifətinin bir hisəsinin diqqətini cəlb etmişdi. Bu da kütlənin fəallaşmasına səbəb oldu. Əgər hadisələr təkcə polis rəisinin girov götürülməsi və hüquq mühafizə oranlarında kadr islahatlarının aparılması kimi olsa idi, bu nə Ermənistan müxalifətinin, nə də beynəlxalq ictimaiyyətin diqqətini çəkə bilərdi. Hadisələrin əvvəlindən siyasi ekspertlər görürdü ki, hakimiyyətə iddialı olan bu qrupun ciddi maliyyə, media və ciddi geopolitik dəstək resursları yox idi. Qərb o hadisələri işıqlandırsa da, ABŞ-ın Dövlət Departamentinin, Avropa İttifaqının Ermənistan hakimiyyətinin hərəkətlərini qınayan, onu daha demokratik olmağa çağıran bəyanatlarına rast gəlmədik. Rusiya tərəfindən də bu bəyanatların verilməməsi anlaşılan idi. Ona görə də, bu hadisələrə məhz klanlararası savaş konteksi kimi yanaşmaq lazımdır. Baş verənlər hakimiyyətə ciddi təsir imkanları olmayan İrəvan ermənilərinin Qarabağ klanı ilə savaşı idi. Bir tərəfin, Sarkisyan iqtidarının maliyyə və media resursları və geopolitik təsiri daha ciddi olduğundan Qarabağ klanına qalib gəlmək və iqtidarı devirmək imkanları kifayət qədər az idi. Ermənistan müxalifətinin fəal hissəsi, əhali arasında ciddi hörməti olanlar bu hadisələrə ciddi müdaxilə etmədi.

Hadisələrin bu sonluqla bitəcəyi heç kəsdə şübhə doğurmurdu. Bunlar sonu məğlubiyyətlə bitəcək proseslər idi. Güman edirəm ki, Qarabağ klanının arxasında Rusiya dəstəyinin olması və qiyamçı tərəfin arxasında isə heç bir ciddi gücün olmaması hadisələrin belə bitməsi ilə nəticələndi".

Səxavət Məmməd
Ölkə.Az