Razi Nurullayev: "Dağlıq Qarabağ üzrə aparılan danışıqlarda Rusiya ilə yanaşı Türkiyənin də iştirakı vacibdir"

Rusiya, Türkiyə və Azərbaycan prezidentlərinin birgə görüşəcəyi barədə xəbərlər yayılıb.

Rusiya və Türkiyə rəsmiləri bildirdi ki, Azərbaycan prezidenti Ankara ilə Moskva arasında gərgin olan münasibətlərin düzəlməsində vasitəçilik edib. Prezidentlərin üçtərəfli görüşü Dağlıq Qarabağ münaqişəsinin həllində açar rolunu da oynaya bilər. Bu görüşdən Rusiya və Türkiyədən əlavə Azərbaycanın da gözləntiləri böyükdür.

Bunla bağlı AXCP sədri Razi Nurullayev Ölkə.Az-a danışıb:

"Türkiyə və Rusiya arasındakı münasibətlərin düzəlməsində Azərbaycan prezidenti kifayət qədər səy göstərib. Türkiyə və Rusiya hökumətləri səviyyəsində bu vasitəçilik cəhdləri qeyd olundu və qiymətləndirildi.

Üç prezidentin nəzərdə tutulan görüşündə münasibətlərin daha da yaxşılaşdırılması, regionda stabillliyin yaradılması, Türkiyədə hərbi çevrilişə cəhd müzakirə olunacaq. Bu görüşdə çox gözəl əsas yaranacaq ki, Dağlıq Qarabağ münaqişəsinin həlli ilə bağlı prosesə necə təkan verməyin yolları müzakirə edilsin.

Azərbaycanla Ermənistanın arasında aparılan danışıqlarda Rusiya ilə yanaşı Türkiyənin də iştirakı vacibdir. Düşünürəm ki, bu görüşdə Dağlıq Qarabağ münaqişəsinin həlli ilə bağlı məsələ gündəlikdədir və bu məsələ üç prezident tərəfindən razılaşdırılmalıdır.

Rusiya ilə Türkiyənin münasibətlərinin yaxşı olması Azərbaycan üçün də xeyirlidir. Rusiya ilə Türkiyə arasında münasibətlər gərgin olan zaman Azərbaycan iki od arasında qalmışdı. Biri qardaş, digəri isə 70 il bir yerdə yaşadığımız dost ölkədir. Azərbaycan həmişə marağındadır ki, Rusiya ilə Türkiyə arasında münasibətlər daim inkişaf etsin. Bəzən Dağlıq Qarabağ münaqişəsi ilə bağlı Türkiyənin bir hərəkət etməsi Rusiyanı, Rusiyanın əlahətdə bir hərəkəti isə Türkiyəni qıcıqlandırır. Bu qıcıqlandırıcı məsələlərin aradan qaldırılması Dağlıq Qarabağ münaqişəsinin həllində müəyyən məsələlərə təkan verə bilər".

Səxavət Məmməd
Ölkə.Az