\"Qarabağ problemini həll etməyin bir yolu var...\"

Ermənistanda polis alayını tutan qiyamçılar təslim olduqdan sonra ABŞ-ın analitik mərkəzi "Stratfor" Ermənistandakı vəziyyətlə bağlı hesabat dərc edib.

Hesabatda bildirilir ki, Ermənistandakı vəziyyət daha da gərginləşəcək. Analitik mərkəz bunu aprel döyüşləri zamanı Ermənistanın məğlubiyyəti ilə əlaqələndirib.

"Stratfor"un hesabatı və Ermənistanda baş verənlərlə bağlı millət vəkili Araz Əlizadə Ölkə.Az-a danışıb:

"Ermənistanda 5-6 nəfər polis alayının qərargahını ələ keçirmişdi. Bu, qiyamdan daha çox tamaşaya oxşayırdı. 2 həftəyə yaxın tamaşa getdi. Əslində onları zərərsizləşdirmək 1 saatlıq iş idi.

Ermənilər Rusiyaya göstərirdilər ki, xalq ayağa qalxır. Əgər Dağlıq Qarabağ münaqişəsi ədalətli həll edilsə, Sarkisyanın hakimiyyətdən getməsi labüddür. Səbəb odur ki, Sarkisyan Qarabağ dalğası ilə hakimiyyətə gəlib. Nə qədər ki, Sarkisyan hakimiyyətdədir, Dağlıq Qarabağ münaqişəsi sülh yolu ilə həll oluna bilməz.

Ermənilər artıq özlərinə yeni yiyə axtarırlar. Rusiya ermənilərinin rəhbəri Ara Abramiyan açıq aydın dedi ki, əgər Rusiyaya Ermənistan yox, Azərbaycan lazımdırsa biz özümüzə sahib axtaraq.

Əvvəllər də demişəm, Qarabağ məsələsini həll etməyin bir yolu var, o da müharibədir. Düşünürdük ki, güclü ordumuz olsa və ermənilərə sarsıdıcı zərbə vursaq ağıllanarlar. Hələlik onların ağıllanmasını müşahidə etmirik. Onlar hətta əksinə Rusiya ilə də oyun oynamaq istəyirlər".

Səxavət Məmməd
Ölkə.Az