"Deyilənlər sifarişlidir, müxalifətin zəiflədilməsinə xidmət edir"

"İstənilən siyasi partiyanın tərkibində gəl-getlər normaldır. Siyasi maraqlar zaman-zaman toqquşa və bu da ayrılıqlara səbəb ola bilər. Amma məsələ ondadır ki, gedərkən nə zamansa qarşılaşanda salam verməyə üz qoymaq lazımdır".

Bunu Ölkə.Az-a Azərbaycan Xalq Cəbhəsi Partiyasının mətbuat katibi Vüsal Qarayev deyib.

O, qeyd edib ki, şər, böhtan atmaq, ləkə vurmaq, qaraguruhla siyasətçi olmaq, cəmiyyətdə nüfuz qazanmaq olmaz:

"Zatən belə bir insandan siyasətçi olmaz. Siyasi mübarizənin də bir əxlaqı olmalıdır. Bu tip insanlar müyyən zaman kimlərəsə istifadə etmək üçün lazım ola bilər. Amma sonra istifadə edib atırlar. Çünki, qaraguruhçu, ona-buna ləkə vurmaqla başını girələyən insanlara kimsə güvənməz, onları ciddiyə almaz. Qaraguruhdan, şərdən-böhtandan, yalandan uzaq olmaq, şəffaflıq, səmimiyyət bugün AXCP-nin əsas prinsiplərindəndir. Mən gedən üzvlərimizə yalnız uğur arzulaya bilərəm. Azərbaycan Xalq Cəbhəsi Partiyası və onun sədru Razi Nurullayev haqqında deyilənlər tamamilə şər-böhtandır, məntiqsiz xəyal məhsuludur. AXCP fəaliyyətdədir, sıralarımız gün-gündən genişlənir, güclənir, hər gün məqsədimizə daha çox yaxınlaşırıq. Hazırda partiya daxilində yüksək əhval-ruhiyyə hökm sürür. Çünki, Razi Nurullayevin sədrliyi ilə uzun illərdən sonra AXCP daxilində demokratik, səmimi abu hava yarandı. Biz partiyadan gedənlərlə də dostluq münasibətimizi saxlamağa hazırıq, amma onlar öz seçimlərini etdilər".

"Bu tip kiçik oyunlar AXCP-ni zəiflədə bilməz, əksinə biz bir-birimizə daha sıx bağlanır, daha da güclənirik" deyən Vüsal Qarayev sonda, "AXCP-nin mətbuat katibi olaraq bir mənalı şəkildə deyirəm ki, haqqımızda deyilənlər və bəzi qeyri-ciddi, “reket” mətbu orqanlarda yazılanlar böhtandır, qaragurhudur, yalandır, sifarişlidir və ölkədə müxalifətin zəiflədilməsinə xidmət edir" deyə vurğulayıb.

Səxavət Məmməd
Ölkə.Az