"Rusiyanı Xəzər dənizində narahat edən nədir?"

Rusiya Xəzər dənizində yenidən təlimlərə start verir

Təlimlər Xəzər dənizinin cənub-qərb hissəsində keçiriləcək. Təlimlər zamanı ölkənin təhlükəsizliyinə təhdid ola biləcək böhranlı durumlar zamanı yerinə yetiriləcək tapşırıqlar sınaqdan keçiriləcək.

Xəzər dənizini hərbisizləşdirmək barədə razılıqlar olsa da, dənizdə tez-tez, xüsusən də Rusiya hərbi təlimlər keçirir. Rusiya Xəzər dənizindən təkcə bu regiondan gələn təhlükələrə qarşı yox, hətta Suriyada İŞİD-ə məxsus obyektləri də Xəzərdəki gəmilərindən vurub. Rusiyanın yaxın zamanlarda Suriyada yenidən hərbi əməliyyatlar həyata keçirəcəyi deyilir. Bu zaman Rusiya Xəzər dənizindən yenidən istifadə edə bilər.

Rusiyanın Xəzər dənizindəki təlimləri ilə bağlı hərbi ekspert Üzeyir Cəfərov Ölkə.Az-a danışıb:

"Rusiyanın Xəzər dənizi ilə bağlı narahatlığı nədir, anlamaq olmur. Xəzər dənizi İran, Rusiya, Azərbaycan, Türkmənistan və Qazaxıstanla əhatə olunub. Xəzər dənizində naməlum uçan obyektlər Rusiya hərbi dəniz qüvvələrinə hansısa bir problem yaratmır ki, Rusiya özünün Xəzər donanmasını gücləndirir və regionu hərbiləşdirir. Son zamanlar Rusiyanın Xəzər dənizi ilə bağlı atdığı addımlar bəzi narahatçılıqlar doğurur.

Dünən Rusiya prezidenti ilə İran prezident çox mehriban şəkildə görüşdülər və bir çox məsələlərdə razılığa gəldilər. Azərbaycan Xəzər dənizində heç bir qonşuya problem yaratmayıb. Qazaxıstan da Rusiya ilə çox yaxındır. Sadəcə Rusiya sakit otura bilmir. Rusiya dünyaya göstərməyə çalışır ki, Xəzərdə hegimon dövlət odur. Bu təlimlər də ona hesablanıb. Düzdür, son zamanlar Rusiya Xəzər dənizində keçirdiyi təlimlərə Azərbaycanı da cəlb edir, ancaq hesab edirəm ki, Azərbaycan Rusiyanın hərbi dəniz qüvvələrindən ən azı dostyana izahat istəməlidir ki, Rusiyanı Xəzər dənizində narahat edən nədir?

Rusiya əgər karbohidrogen resurslarına görə narahtdırsa, hesab edirəm ki, buna əsas yoxdur. İran prezidenti Azərbaycanda olanda Xəzər dənizindəki enerji ehtiyatlarının bölünməsi ilə bağlı tərəflər arasında danışıqların aparılması və bu yöndə konkret qərarın qəbul olunması ilə bağlı fikir səsləndirdi.

Rusiyanın Xəzər dənizində təlim keçirəcəyi haqda məlumatı eşidəndə Ermənistanın xəstəliyi yadıma düşdü. Mühüm görüşlərdən sonra Sarkisyan dərhal işğal altındalkı ərazilərə gedib, təlimlərə start verir. İndi Putinin getdiyi təyyarənin motoru hələ soymamış Rusiya Xəzər dənizində təlimlərə start verir. Deyə bilərlər ki, bu təlimlər planlı şəkildədir, ancaq axı ruslar yaxın zamanlarda Xəzər dənizində təlim keçirmişdilər.

Əgər bu təlimlər Suriyada İŞİD-in mövqelərini vurmaq üçün nəzərdə tutulubsa, Rusiya ən azından region ölkələrini məlumatlandırmalıdır. Xəzər dənizində bu qədər ardıcıl təlimlərin keçirilməsi anlaşılan deyil. Sözdə deyirlər ki, Xəzər sülh gölü olmalıdır, burada silahlı qüvvələrin sayı azaldılmalıdır. Əməldə isə görürük ki, Xəzər dənizində vəziyyəti gərginləşdirirlər. Rusiyanın məqsədinin nə olmasını yaxın zamanlarda görəcəyik".

Səxavət Məmməd
Ölkə.Az