Razi Nurullayev: "Görüşlərin Azərbaycan üçün müsbət və narahatedici tərəfləri var"
"Azərbaycan, Rusiya və Türkiyə münasibətlərində yeni inkişaf mərhələsi Azərbaycan üçün də çox faydalıdır. Çünki, Azərbaycan müəyyən qlobal, regional proseslərdə aparıcı rola malik olmaq istəyir".
Bunu Ölkə.Az-a açıqlamasında Azərbaycan Xalq Cəbhəsi Partiyasının sədri Razi Nurullayev deyib. O bildirib ki, Azərbaycan müəyyən mənada öz istəyinə nail olsa da, məsələnin narahatedici tərəfləri də var:
"Putin də öz çıxışında qeyd etdi ki, Azərbaycan Prezidenti bizi bir araya gətirdi və buna görə də ona minnətdar olmalıyıq. Azərbaycan prezidentinin də istəyi bəlkə bu idi, yəni müəyyən qlobal proseslərdə artıq aparıcı bir oyunçuya çevrilmək. Digər məsələlərdən biri də 26 fevralda keçiriləcək Referendumdur. Konstitusiyaya ediləcək dəyişikliyə təbii ki, beynəlxalq təşkilatların, qurumların, o cümlədən bir çox Avropa birliyi dövlətlərin, ABŞ-ın bu və ya digər şəkildə tənqidi mövqeləri ola bilər. Və buna görə də Azərbaycan bu məqamda region dövlətlər ilə münasibətlərini daha sıx bir şəkildə inkişaf etdirmək istəyir. Və bununla beynəlxalq aləmə, güclərə müəyyən mesaj da vermək niyyətindədir. Azərbaycan İran, Azərbaycan Rusiya yaxınlaşması və bunun daha da irəliyə getməsi təbii ki, ABŞ-ı da, Avropa Birliyi dövlətlərini də narahat etməyə bilməz. Onlar Rusiyaya sanksiya tətbiq ediblər, Rusiyanı qeyri demokratik ölkə hesab edirlər və onlar da Rusiyaya qarşı eyni münasibəti bəsləyən ölkələri sevirlər, o dövlətlərlə münasibətləri daha yaxşı olur və təbii ki. Azərbaycan da bu addımı seçməklə həmin təşkilatları, ölkələri bu və ya digər şəkildə Azərbaycanla bağlı daha ehtiyyatlı olmağa sövq etmək niyyətindədirlər. Təbii ki, bu narahat edici məqamdır. Lakin artıq regionda baş verən hadisələr onu göstərdi ki, qonşu ölkələrdən gələn təhlükələr daha böyük ola bilər və bu baxımdan hesab edirəm ki, Azərbaycan da balanslı siyasətini yeni bir formatda davam etdirməyə üstünlük verdi. Bütün bunlar dövlətin geopolitik maraqlı ilə yanaşı, həm də iqtidarın hakimiyyətdə qalmasına da xidmət etmiş olur".
Qarabağ probleminə gəlincə isə Razi Nurullayev bildirib ki, Rusiya bir başa Ermənistana təziq göstərmək fikrində olmasa da, istənilən halda məsələni Azərbaycanın xeyrinə həll edə bilər:
"Əgər bu gün Rusiya dağlıq Qarabağ münaqişəsinin həlli ilə bağlı çalışırsa, müəyyən bir nəticə əldə etmək istəyirsə, İranın maraqları bundan kənardadırsa İran danışıqlar prosesinə və sülhün gəlməsinə maneçilik törədəcək. Türkiyənin maraqlarından kənarda olarsa, Türkiyə ilə Rusiyanın maraqları toqquşarsa təbii ki, Türkiyə də bunda maraqlı olmayacaq. Bu baxımdan ola bilsin ki, bağlı qapılar arxasında artıq bu cür danışıqlar olub və artıq Türkiyə, Rusiya və İranın !arabağ münaqişəsinin həlli ilə bağlı mövqelərinin uyğunlaşdırıması qərara alınıb. Mən düşünürəm ki, məhz elə bu görüş Qarabağ münaqişəsinin Azərbaycanın xeyrinə həll olunması və həmin dövlətlərin ədalətli mövqe sərgiləməsi ilə nəticələnə bilər. Bir başa təbii ki, biz deyə bilmərik Rusiya ermənistanı cəzalandıracaq, Ermənistana Azərbaycanın işğal etdiyi torpaqlarından geri çəkil, çəkilməsən səni cəzalandıracam, sənin arxandan çəkiləcəm, artıq mənim forpostum deyilsən deyəcək. Bu baş verməyəcək. Təbii ki, Rusiya bu gün də Ermənistanı özünün strateji müttəfiqi sayır, amma Azərbaycanla bağlı isə Putin deyir ki, Azərbaycanla strateji müttəfiqliyə yaxınlaşmışıq. Təbii ki, Rusiya Ermənistanı cəzalandıraraq Qarabağ problemini həll edə bilməz. O baxımdan məhz Ermənistanın da özünü komfortlu, rahat hiss edəcəyi bir metod üzərində düşünürlərki, ermənilər özünü uduzmuş hesab etməsin, Sarkisyanın hakimiyyətdə qalmasına problem yaranmasın. Əslində bu Azərbaycan üçün də məqbuldur. Azərbaycan üçün vacib olan ərazi bütövlüyünün təmin olunması, Ermənistanın işğal etdiyi ərazilərdən geri çəkilməsidir".
