"Qarabağ münaqişəsinin həlli üçün Türkiyə-Rusiya-Azərbaycan formatı yaradılacaq"

Ölkə.Az "Habertürk" saytına istinadən xəbər verir ki,Türkiyə prezidenti Rəcəb Tayyib Ərdoğan Sankt-Peterburqda Rusiya prezidenti ilə görüşdən sonra jurnalistlərə verdiyi açıqlamada Türkiyə-Rusiya-Azərbaycan üçtərəfli formatının yaradılmasına müsbət münasibətin olduğunu bildirib.

O deyib ki, Azərbaycanla yanaşı, Rusiya da bu formatın yaradılmasına müsbət cavab verib.

"Cənab Putinlə bunu müzakirə etdik və razılğa gəldik. Məqsəd, bölgədəki siyasi prosesləri yerində, yaxından izləməkdir. Xüsusilə də Qarabağ məsələsini.23-24 il keçib, hələ də bu məsələni həll etməyiblər və ya həll etmək istəməyiblər. Bu işğalı hər kəs qəbul edir. Əgər işğal varsa, bunu niyə həll etmirsiniz?”, deyə Ərdoğan Putinə sual verib.

O, həmçinin işğal olunmuş 5 rayonun qaytarılması barədə də söz açıb:

“Daha əvvəl bəhs edilən 5 rayon azad edilərsə, zənnimcə ordakı problem ciddi şəkildə normallaşmağa başlayacaq”, deyə Ərdoğan jurnalistlərə bildirib.

Türkiyə prezidenti, Rusiya, Fransa və ABŞ-ın iştirakı ilə Minsk qrupunun münaqişənin həllinə nail olmadığını deyib və Türkiyənin iştirakı ilə daha fərqli nəticələrin ola biləcəyini vurğulayıb.

İlhamə
Ölkə.Az