"Türkiyənin Qərbdən üz döndərəcəyi və NATO-dan çıxacağı cəfəngiyyatdır"

Ərdoğan Türkiyənin Avropa İttifaqı ölkələrindən geri göndərilən suriyalı qaçqınları qəbul etməyəcəyini bildirib.

Ərdoğan bildirib ki, Avropa Türkiyə vətəndaşları üçün vizasız rejim tətbiq ediləcəyi barədə vədini tutmayıb.

"Bunun qarşılığında isə Avropa İttifaqı ölkələrindən geri göndərilən suriyalı qaçqınları Türkiyəyə qəbul etməyəcəyik", deyə Ərdoğan vurğulayıb.

Türkiyə və Rusiya prezidentlərinin görüşündən sonra türkiyəli rəsmilər Avropa haqqında hədələyici fikirlər səsləndirirlər. Hətta Türkiyənin Xarici işlər naziri Mövlud Çavuşoğlu NATO-nun Tükiyəni itirdiyini bildirmişdi.

Türkiyə ilə Avropa arasında yaranmış siyasi böhran haqqında politoloq Zərdüşt Əlizadə Ölkə.Az-a danışıb:

"Tərəflər sövdələşiblər. İmkanlarını hesablayıblar. Qərbin və Türkiyənin bir-birinə qarşı səsləndirdiyi fikirlər adi xəbərdarlıqdır. Ciddi heç nə yoxdur, ola da bilməz. Türkiyənin Avropadan qopacağını düşünmək düzgün deyil. Türkiyə Qərb dünyasının bir hissəsi və NATO-nun üzvüdür. Hər iki tərəfin bir-birinə ehtiyacı var.

Rusiya ilə Türkiyənin yaxınlaşması təbii bir şeydir. Hər iki tərəf öz problemlərini həll etmək istəyir. Türkiyə və Rusiya bir-birilərindən qazanmaq istəyir. İqtisadiyyatlarının inkişafı üçün Türkiyə ilə Rusiyanın yaxınlaşması normaldır. Türkiyənin Qərbdən vaz keçəcəyi, NATO-dan çıxacağı isə cəfəngiyyatdan başqa bir şey deyil".

Səxavət Məmməd
Ölkə.Az