Baş katib: "Bu yaxınlarda Azərbaycanda böyük hadisə də olacaq"
“Fətullah Gülən şəbəkəsinin Azərbaycanda gedən proseslərə böyük təsir göstərmək imkanı yoxdur”.
Bunu Ölkə.Az-a eksklüziv açıqlamasında Qara Dəniz İqtisadi Əməkdaşlıq Təşkilatı (QDİƏT) Parlament Assambleyasının baş katibi, Milli Məclisin sabiq deputatı Asəf Hacıyev bildirib.
Baş katib Gülən şəbəkəsinin Azərbaycanda gedən proseslərə ciddi təsiri olduğuna inanmadığını söyləyib:
“Doğrudur, vaxtilə Azərbaycanda Gülən məktəbləri və hər hansı təşkilatları mövcud olub. Ancaq Azərbaycan da güclü dövlətdir. Cənab Prezident İlham Əliyev ölkəni yüksək səviyyədə idarə edir. Onun liderliyi sayəsində Azərbaycan dövləti sürətlə inkişaf edir və dünyaya tanınır. Ona görə də hər hansı dairələrin və təşkilatların Azərbaycandakı proseslərə mane olması mümkün deyil”.
Türkiyədə baş verən 15 iyul hadisələrinə də toxunan A.Hacıyev deyib ki, hazırda qardaş ölkədə vəziyyət sabitləşib:
“Prezident Rəcəb Tayyib Ərdoğan 15 iyul günü bütün dünyaya bir daha göstərdi ki, Türkiyə dövləti güclü əllərdədir. Ona görə də Türkiyədə heç bir dövlət çevrilişinə imkan verilmədi. Ümumiyyətlə, indiyədək qardaş ölkədə 4-5 dövlət çevrilişi olmuşdu ki, onların hər biri baş tutmuşdu. Ancaq 15 iyul günü Türkiyə tarixində ilk dəfə idi ki, hərbi çevriliş baş tutmurdu. Çünki Türkiyə artıq ayrı və güclü dövlətdir. Bu gün Türkiyədə demokratiya tam bərqərar olub. Türkiyə prezidenti cənab Rəcəb Tayyib Ərdoğan isə xalq tərəfindən demokratik yolla seçilmiş şəxsdir. Ona görə də 15 iyul çevrilişi baş tutmadı”.
A.Hacıyev qeyd edib ki, indi Azərbaycanda da sabitlik hökm sürür:
“Fətullah Gülən və sairə təşkilatların Azərbaycanda sabitliyi pozmaq imkanları yoxdur. Bununla bağlı Azərbaycan üçün ciddi narahatçılıq yoxdur. Hesab edirəm ki, Gülənin Azərbaycanda əlaqələri ilə bağlı yayılan məlumatlar əsassızdır. Ortada olan isə yalnız söz-söhbətlərdir. Yazırlar ki, filan şəxs, filan təşkilat Azərbaycan hökumətinə təsir edir və sairə. Ancaq ortada konkret faktlar, dəlillər yoxdur. Mənə elə gəlir ki, yazılanların əksəriyyəti şayələrdir”.
Sabiq deputat qeyd edib ki, Azərbaycanda düşünülmüş uğurlu siyasət aparan xətt mövcuddur:
“Azərbaycan dövləti də həmin xətt üzrə uğurla hərəkət edir. Bu yaxınlarda Azərbaycanda böyük hadisə də olacaq. Ölkəmizdə Referendum keçiriləcək. Azərbaycan referendumla bir daha dünyaya demokratiya nümayiş etdirəcək. Digər tərəfdən isə Azərbaycan xalqı öz gələcəyini görür və ölkə Prezidenti İlham Əliyevin yürütdüyü siyasəti dəstəkləyir.
Diqqət edin, son prezident seçkilərində cənab İlham Əliyev 80 faizdən çox səs toplayıb. Bu, xalqla prezident arasında olan etimadın göstəricisidir”.
Zaur Əziz
