Arif Rəhimzadə: “Xarici ölkə səfirliklərinin müxalifətlə hərəkət etməsi qətiyyən doğru deyil”
Yeni Azərbaycan Partiyası (YAP) Siyasi Şurasının və İdarə Heyətinin üzvü, Milli Məclisin Regional məsələlər komitəsinin sədri Arif Rəhimzadə Milli Şurada təmsil olunan bəzi partiya liderlərinin intensiv şəkildə ABŞ, Böyük Britaniya və Fransa dövlətlərinin Azərbaycandakı səfirliyinə çağırılaraq, orada görüşlər keçirməsinə münasibət bildirib.
YAP-çı deputat A.Rəhimzadə Ölkə.Az saytına açıqlamasında bu cür halların yolverilməz olduğunu söyləyib:
“Mən bilmirəm ki, bütün bu məlumatlar nə qədər dəqiqdir. Ancaq istənilən halda xarici ölkələrin Azərbaycandakı səfirliklərinin bu məsələ ilə bağlı hərəkət etməsi qətiyyən doğru deyil. Təkcə bu cür görüşlərin özü göstərir ki, Milli Şuranın dəstəkçisi kimdir, məqsədləri nədir”.
A.Rəhimzadə qeyd edib ki, Milli Şuranın etiraz aksiyaları təşkil etməsinin Azərbaycan üçün heç bir əhəmiyyəti yoxdur:
“Heç kəs deyə bilməz ki, dünyanın hər hansı yerində nöqsan yoxdur. Əlbəttə ki, hər bir ölkədə problemlər olduğu üçün Azərbaycanda da müəyyən nöqsanlar mövcuddur. Ancaq bu nöqsanları sadalayan adamın gərək mənəvi haqqı olsun. Mənəvi haqqı olmayan adamların nöqsanlardan danışmasına heç kəs məhəl qoymayacaq. Düşünürəm ki, bu, belə anlaşılacaq”.
Xatırladaq ki, Milli Şuranın sentyabrın 11-nə təyin etdiyi mitinqin arxasında bir sıra Qərb dövlətlərinin dayanması ilə bağlı məlumatlar yayılıb.
Zaur Əziz
