Bu səbəbdən Azərbaycanda mitinq taktikası alınmayacaq

Uzun müddət sonra Azərbaycan müxalifəti sabah mitinq keçirəcək.

Mitinqi Milli Şura ilə AXCP birgə təşkil edib. Daha öncə Müsavat Partiyasının da mitinqdə iştirak edəcəyi gözlənilsə də, sonradan partiyalar bu məsələdə razılığa gəlməyiblər. Mitinq Bakı Şəhər İcra hakimiyyəti ilə razılaşdırılıb. Meriya mitinq üçün son zamanlar ənənəvi olan "Məhsul" stadionunu ayırıb.

Mitinq, müxalifətin hazırkı durumu və cəmiyyətin siyasi prosseslərə münasibəti barədə politoloq Qabil Hüseyinli Ölkə.Az-la fikirlərini bölüşüb:

"Uzun müddətdir ki, mitinqlər keçirilmir. Son mitinqlər 2 il bundan əvvəl keçirilib, o da çox zəif olub. Müxalifətin ən zəif yerlərindən biri onun əhali ilə təmaslarının zəif olması, əhalinin içərisinə girə bilməməsi, onu bəlli hədəflərə yönəldə bilməməsidir.

Mitinqlər həm müxalifət üçün, həm də cəmiyyətin siyasi aktivliyi üçün vacib elementlərdən biridir. Demokratik cəmiyyətlərdə mitinqlərin keçirilməsi məqbul qarşılanır. Bu insanların sosial fəallığını yüksəldən, insanların hakimiyyət üzərində ictimai nəzəratini təmin edən bir amil kimi qəbul edilir. Təəssüf ki, Azərbaycanda belə bir vəziyyət yoxdur. Mitinqlərin normal şəkildə keçməsi, cəmiyyətin ictimai ovqatına təsir etməsi üçün güclü siyasi avanqarda, yəni, siyasi partiyalara, QHT-lərə böyük imtiyaz verilib. Bu gün müxalifətdə çox güclü pərakəndəlik, dağınıqlıq var. Eyni zamanda partiyalar hiss ediləcək dərəcədə zəifləyiblər və əhalinin əhval-ruhiyyəsinə nüfuz etmək imkanları demək olar ki, yox dərəcəsindədir. Bu nöqteyi-nəzərdən etiraf etməyə məcburam ki, güclü mitinqlərin keçirilməsi hazırda mümkün deyil. Çünki, partiyalar arası əlaqələr demək olar ki, yox dərəcəsindədir. Siyasi partiyalar arasındakı münasibətlər ürəkaçan deyil. Siyasi partiyaların üzvləri isə vəziyyəti aktuallığı, dəqiqliyi ilə təsəvvür edə bilmirlər.

Belə bir aşılmaz vəziyyət yaranıb. Bu vəziyyət çərçivəsində "Məhsul" meydanını tamamilə dolduran, izdihamlı mitinq keçirməyə imkanlar demək olar ki, görünmür. AXCP və Müsavat Partiyası arasındakı danışıqlar mitinqdən əvvəl alınmadı. Müsavat Partiyası AXCP-dən sonra mitinq keçirmək qərarına gəldi. Bu da sadəcə prestij məsələsidir. Cəmiyyətin gözündən tamamilə düşməmək üçün nəsə bir şey etmək arzusundan doğan bir hərəkətdir.

Zəif mitinqlər, mitinqin mahiyyətini gözdən salır və əhalinin həm siyasi partiyalara, həm siyasi fəallığa olan münasibətini daha da pisləşdirə bilər. Cəmiyyətin passivləşməsi prossesi daha da güclənər. Mitinqlərin müəyyən qədər güclü keçməsi üçün özünü müxalifət adlandıran qüvvələr heç olmasa birlik nümayiş etdirməlidir. Xalq görməlidir ki, bu insanların hansısa hədəfi var və bu hədəf naminə birləşirlər. Ondan sonra insanların içərisində oyanış əhval ruhiyyəsi yaranar. İnsanlar da mitinqə gələ bilər. Görəndə ki, mitinq keçirən partiyaların özləri birləşə bilmir, ambissiyalarının üzərindən aşıb keçə bilmirlər, insanlar bu cür tədbirlərə lazım olan qədər əhəmiyyət vermirlər. İnsanlar daha çox gündəlik qayğılarına üstünlük verməyə başlayırlar. Bu səbəbdən də Azərbaycanda mitinq taktikası hələ bir müddət alınmayacaq".

Qeyd edək ki, Milli Şuranın mitinqi sabah, 11 sentyabr 2016-cı il 17:00-da "Məhsul" stadionunda olacaq.

Səxavət Məmməd
Ölkə.Az