\"Türkiyə Rusiyanın təxribatçı bəyanatlarına uymamalıdır\"

"Rusiya donanması Qara dənizdə Türkiyə donanmasından daha güclüdür"

Bu sözləri Rusiya silahlı qüvvələrinin baş qərargah rəisi Valeri Gerasimov Krımda keçirilən "Qafqaz 2016" hərbi təlimləri barədə danışarkən deyib.

Gerasimov bildirib ki, bir neçə il öncə bizim Qara dənizdəki donanmamız türk donanmasından geri qalırdı. Amma artıq hər şey dəyişdi. İndi bizim hərbi donanmamız Qara dənizdə ən güclü donanmadır.

Rusiya-Türkiyə münasibətlərinin düzəldiyi bir zamanda Rusiya silahlı qüvvələrinin baş qərargah rəisi Valeri Gerasimovun bu çür açıqlama verməsi təəccüblə qarşılanıb.

Gerasimovun səsləndirdiyi fikirlə bağlı hərbi ekspert Üzeyir Cəfərov Ölkə.Az-a danışıb:

"Rusiya silahlı qüvvələrinin baş qərargah rəisi Valeri Gerasimov bu gün Türkiyəyə rəsmi səfərə gəlib. Gerasimovla Türkiyə ordusunun baş qərargah rəisi Hulusi Akarın görüşü olacaq. Düşünürəm ki, Türkiyə tərəfi bu məsələ ilə bağlı diplomatik şəkildə Rusiyaya öz narazılığını bildirəcək.

Rusiya silahlı qüvvələrinin baş qərargah rəisi Valeri Gerasimov açıqlamaları ilə həm Türkiyə hərbi dəniz qüvvələrini, həm də bütövlükdə NATO-nun zəifliyinə eyham vurub. Əslində bu belə deyil. Türkiyə ordusunun gücü Suriyada keçirilən əməliyyatlar zamanı ortaya çıxdı. Türkiyə nəinki Qara dənizdə, ümumiyyətlə digər dənizlərdə də çox güclü dəniz donanmasına malikdir. Türkiyənin arsenalında olan gəmilər ən müasir standartlara cavab verir.

Gerasimov niyə məhz indiki vəziyyətdə, Türkiyə-Rusiya münasibətlərinin düzəldiyi məqamda bu açıqlamanı verib, anlamaq olmur. Rusiya tərəfi fikirləşir ki, Türkiyə bu həssas məqamda bu fikirə etiraz etməyəcək. Rusiya niyə 15 iyuldan əvvəl bu sözü demirdi? 15 iyuldan sonra nə baş verdi ki, Qara dənizdə Türkiyə zəiflədi? Əslində heç nə baş vermədi. Əksinə, Türkiyə ordusu güclüdür. Türkiyə ordusu əvvəlki illərə nisbətən bir qədər də səfərbər olub, toparlanıb.

Rusiya Türkiyəni NATO-dan qopardıb sonrakı mərhələdə rəsmi Ankaranı bəzi məsələlərdə özündən aslı vəziyyətə salmaq üçün cəhdlər edəcək. Rusiya həm açıqlamaları ilə, həm də münasibəti ilə Türkiyəni çətin vəziyyətdə qoyacaq. Ona görə də, iyul hadisələrindən bir qədər keçəndən sonra sizinlə söhbətdə qeyd etdik ki, Türkiyə tələsməməlidir. Türkiyə Rusiyanın təxribatçı bəyanatlarına uymamalıdır.

Hulusi Akar bağlı qapılar arxasında Gerasimovla danışıqları zamanı bu məsələ ilə əlaqədar öz narazılığını bildirməlidir. Gözləyirdim ki, Türkiyə bunu açıq şəkildə edəcək, yəqin bugünkü görüşlə bağlı iradı saxlayıblar. İkitərəfli görüş zamanı Rusiya tərəfinə narazılıq bildiriləcək. Türkiyə bunu etməsə, NATO Gerasimovanın cavabını verəcək".

Səxavət Məmməd
Ölkə.Az