\"Ölkədə mövcud stabilliyə ciddi təhdid var\"

11 sentyabr mitinqində AXCP sədri Əli Kərimli 17 sentyabr yeni mitinqin keçiriləcəyini açıqladı. 18 sentyabrda isə əvvəlcədən bilinirdi ki, Müsavat Partiyası mitinq keçirəcək.

Referendum ərəfəsi müxalifətin fəallaşmasını bir çox amillərlə bağlayırlar. Müxalifət tərəfi bunu xalqın tələbi, iqtidar tərəfi isə Qərbin işi kimi qiymətləndirir.

Müxalifətin son dövrdə fəallaşmasına politoloq Elşən Manafov Ölkə.Az-a verdiyi açıqlamasında aydınlıq gətirib:

"Müxalifətin məlum qanadının təşkil etdiyi sonuncu mitinqin əvvəlki mitinqlərlə müqayisədə möhtəşəmliyi ölkədəki narazı elektoratın müxalifətin bu qanadına etimadından irəli gəlmir. Mitinq keçirilən ərəfədə mitinq keçirən partiyaların rəhbərləri ABŞ, Kanada və Böyük Britaniyanın Azərbaycandakı səfirlikləri ilə görüşlər keçirib. Çox təəssüf ki, Azərbaycanın apardığı balanslaşdırma siyasəti və Qərbin diqtəsi ilə getməməsi Qərb xüsusi xidmət orqanlarında xüsusi narahatlıq doğurmağa başlayıb. Məqsəd ölkədəki oturuşmuş sabitliyi pozmaqdır.

Əslində son mitinqin möhtəşəmliyi maliyyə resurslarının olması ilə sıx bağlıdır. Eyni texnologiyalarla rəngli inqilabları Qərb xüsusi xidmət orqanları Gürcüstan, Ukrayna və Moldovada tətbiq ediblər. Səbəbləri də bəllidir. Hakim siyasi elitanı hakimiyyətdən kənarlaşdırmaq, Qərbin maraqlarına cavab verənləri hakimiyyətə gətirmək.

Bu günlərdə dostum Zərdüşt Əlizadə maraqlı bir söz dedi. Zərdüşt Əlizadə bildirdi ki, hakimiyyətə gəlmək üçün Əli Kərimli buddist şüarlarından da istifadə etməyə hazırdır. Bu mənada Əli Kərimlinin ölkənin sosial bazasına ciddi təsir imkanları yoxdur.

Mitinqdə müsavatçılar da var idi, ancaq onlarla yanaşı xüsusi xidmət orqanlarının əməkdaşları da var idi. Bu mənada mitinqin möhtəşəmliyi kifayət qədər şübhə və suallar doğurur.

Əli Kərimlinin mitinqdə islamçı şüarlar səsləndirməyi ciddi narazılıqlar və suallar doğurdu. Bu da onu göstərir ki, bəzən sivil müxalifət adına, ana müxalifət adına iddialı olan AXCP-nin məlum qanadı lazım olsa radikal islamçı qüvvələrlə də münasibət qurub, ölkədəki stabilliyi pozmaq üçün səylərini əsirgəməyəcək. Güman edirəm ki, baş verən proseslər ölkənin xüsusi xidmət orqanlarının, hüquq-mühafizə orqanlarının nəzarətindədir.

Ölkənin hakimiyyətlə yanaşı siyasi müxalifəti də var. Siyasi müxalifət siyasi müstəvidə ona aid olan yeri doldurmaq imkanlarına malik olmalıdır. Kifayət qədər səriştəli insanlar var. Düşünürəm ki, həmin mitinqlərə adekvat mitinq və tədbirlərin keçiriləcəyini görəcəyik.

Müsavat Partiyası ilə AXCP arasında kifayət qədər problemlər var. Milli Şura məhz bu iki partiyanın arasında baş verən problemə görə parçalandı. Milli Şuranın parçalanmasına səbəblərdən biri də, Müsavat Partiyası ilə AXCP arasında ayrılmış maliyyənin düzgün bölüşdürülməməsi oldu. Ölkədə mövcud stabilliyə ciddi təhdid var. Müxalifətli-iqtidarlı sabitliyi, ölkə üçün təhlükəni aradan qaldırmalıyıq".

Səxavət Məmməd
Ölkə.Az