\"Konstitusiyanı tapdalayırlar, ancaq Məzahir Pənahov deyir ki, hər şey yaxşıdır\"

"Azərbaycan konstitusiyası döşəmə əskisi kimi ayaq altına atılıb, konstitusiyanı tapdalayırlar ancaq Məzahir Pənahov deyir ki, hər şey yaxşıdır"

"Əli Kərimli o seçkinin birini niyə normal qaydada öz təşkilaında keçirmir?"

 

Mərkəzi Seçki Komissiyasının sədri Məzahir Pənahovun Almaniyada keçirilən seçkilər və oradakı qanun pozuntularını tənqid etməsi birmənalı qarşılanmayıb. Müxalif tərəf Məzahir Pənahovun səsləndirdiyi fikirləri kəskin şəkildə tənqid edib. Bununla bağlı politoloq Zərdüşt Əlizadə və millət vəkili Zahid Oruc Ölkə.az-a öz fikirlərini bildirib.

 

Zərdüş Əlizadə: "Yalnız son seçkilərdə müşahidəçi olmamışam, bundan əvvəliki 17 seçkinin hamısında müşahidəçi olmuşam. Mən inkar etmirəm ki, Almaniyada hansısa seçki ilə bağlı mübahisəli məsələ olamasın. Mübahisəli məsələ olanda tamamilə müstəqil məhkəmələrə müraciət edirlər, həmin məhkəmə də qanuna söykənərək düzgün qərar çıxarır. Ancaq Azərbaycanda müstəqil məhkəmə yoxdur. Hakimlərin hamısı "say-seçmə", asılı, sifarişlə işləyən adamlardır. Bundan başqa Azərbaycandakı seçkilərin pozulmasının mahiyyəti, miqyası Almaniyada olan pozuntulardan tamamilə fərqlidir. Azərbaycanda son seçkilərdə böyük "karusel"lər oldu, ancaq Almaniyada "karusel" olmur. Almaniyada partiya müşahidəçilərinin külli-ixtiyarı var, onlar seçkilərin gedişini tam nəzarətdə saxlaya bilirlər. Azərbaycanda isə partiya nümayəndələrini heç məntəqələrə belə buraxmırlar. Almaniyada saxta bulletənlərin atılması, ölü canların "dirilməsi", seçki arası müddətdə siyasi rəqiblərin əhaliyə müraciət etmək imkanlarının məhdudlaşması halı olmur. Bizdə seçkilərin mahiyyəti, taleyi seçkiarası dövrdə müəyyənləşir. Seçkiarası dövrdə hakimiyyət müxalifətin bütün rəsmi təbliğat vasitələrini əlindən alır. Son vaxtlar Avropada görürük ki, böyük şəhərlərin mərkəzində nümayişlər gedir. Azarbaycanda isə yalnız "Məhsul" stadionunda, ya da şəhərdən kənarda bir yerdə olur.

 

Məzahir Pənahov bir az ötkəm danışır ona görə ki, son seçkilərdə artıq müxalifət o qədər heysizləşdirilib, halsızlaşdırılıb ki, mübarizə aparmaq iqtidarında deyil. Müxalifət kifayət qədər güclü olanda, hakimiyyət ağlasığmaz zorakılıqlara əl atırdı, ağlasığmaz saxtakarlığa əl atırdı. İndi isə hakimiyyət seçkilərarası dövrdə o qədər müxalifətin imkanlarını məhdudlaşdırır ki, müxalifətin seçkilərdə iştirakının əhəmiyyəti qalmır. Azərbaycan konstitusiyası döşəmə əskisi kimi ayaq altına atılıb, o konstitusiyanı tapdalayırlar ancaq Məzahir Pənahov deyir ki, hər şey yaxşıdır".

 

Zahid Oruc: "Dünyada keçirilən seçkilərin həddən artıq ideal səviyyədə olduğunun Azərbaycanda təqdimatına çalışan qüvvələr birinci olaraq bunları informasiya vasitələrinin üzərində həyata keçirirlər. Əyani olaraq orada iştirak edəndə mənzərənin nə qədər fərqli olduğu görünür. Heç kim iddia etmir ki, Almaniyada proses əvvəldən axıra qeyri-şəffaf, demokratik prinsiplərə uyğun olmayan bir formada keçib. Məsələ belə qoyulmamışdı, Məzahir Pənahovun dediyi faklarda siyahıda kiminsə adının olmaması, buna bənzər başqa hallar olmasından söhbət gedirdi. Ola bilər ki, bu gün xüsusi texnologiyalar, rəqibin zərərsizlşədirilməsi üçün atılan addımlar, onun fondunun formalaşmasında qeyri-şəffaf vəsaitlər, inzibati resurs və sair amillər istənilən ölkədə rol oynayır. Məgər bunu inkar etmək mümkündür? Qərbdə istənilən seçkinin sonunda rəqiblərin bir-birinə qarşı ittihamında dediyimiz məsələlər yer alır.

 

Heç kim iddia etmir ki, Almaniyada seçki saxta keçirilib, qutular bülletenlərlə doldurulub və bunu deməklə Almaniyanın seçki sistemini ləkələmək istəyirik. Məzahir Pənahov qarşısına belə bir məqsəd qoymayıb, ona görə də onun dediyini başqa konteksdə götürüb öz xeyrinə şərh etməyin mənası yoxdur. Bunlardan yola çıxıb ironiya ilə çıxış edən "Cəbhə mediası" qoy həmdə özlərinə aid olan uzun müddət müttəfiq olduqları, bir siyasi ideanı paylaşdıqları, Milli Şurada bir araya gəldikləri "Müsavat" partiyasında yeni keçirilən seçkilərə qiymət versinlər. Məgər cəbhədə keçirilən seçkilər bundan çox ibrətamiz dərəcədə fərqlidir? Əli Kərimli o seçkinin birini niyə normal qaydada öz təşkilatında keçirmir? Əli Kərimlidən başqa o partiyanın sədri ola bilməz? O qədər əvəzolunmazdı bu Əli Kərimli? O qədər məğlubiyyətlər qazanıb, bəs hansı şəraitdə rəhbər dəyişməlidir? Əlbəttə onu əvəz edəcək adam da yoxdur. AXCP-də Elçibəydən miras qalan adamlardan hansı qalıb?

 

Məzahir Pənahova qarşı yüklənən adamların özü seçki bataqlığındadırlar və öz təşkilatlarını qeyri demokratik şəkildə idarə etməkdədirlər".

 

Səxavət Məmməd

Ölkə.az