\"BMT-nin mexanizmlərinin işləməməsi bu gün nüvə təhlükəsini daha çox artırır\"

Bu gün nüvə silahından istifadə ehtimalı çox yüksəlib

Bu sözləri ABŞ-ın müdafiə naziri Eşton Karter deyib.

Eşton Karter bildirib ki, Şimali Koreya və Rusiyanın bu sahədə yaratdığı təhlükə nəzərə alınarsa, vəziyyət "soyuq müharibə" dövründəki kimidir.

Son dövrlərdə nüvə silahına sahib olan ölkələr bundan istifadə edə biləcəyinin siqnallarını veriblər.

Nüvə təhlükəsi ilə bağlı hərbi ekspert Üzeyir Cəfərov Ölkə.Az-a danışıb:

"Nüvə təhlükəsi əvvəlki illərə baxıldığında daha realdır. XX əsrin sonlarında NATO və Varşava müqaviləsi üzvləri bir-birilərini hədələyirdilərsə, indi Varşava müqaviləsi yoxdur. İndi NATO, Şimali Koreya, Rusiya və digər dövlətlərin "dəliqanlı başçıları" var ki, nüvə silahından hədə kimi istifadə edirlər. Bizim bədnam qonşumuz Ermənistan da aprel hadisələri zamanı deyirdi ki, bizdə nüvə silahı var.

BMT-nin əvvəlki nüfuzu artıq yoxdur. Butros Butros Qali, Kofi Annanın zamanında BMT çox nüfuzlu idi. Pan Gi Munun dövründə isə BMT-nin o nüfuzu artıq qalmayıb. Pan Gi Mun hiyləgərcəsinə vəzifədə vaxt keçirməklə ömrünü sürür. Faktiki olaraq BMT-nin mexanizmlərinin işləməməsi bu gün nüvə təhlükəsini daha çox reallaşdırır. Şimali Koreya dəfələrlə nüvə sınaqlarını həyata keçirib. İndi Eşton Karter ona işarə edir ki, istənilən an Şimali Koreya, Rusiya və digər ölkələr nüvə silahından istifadə edə bilərlər. Bu zaman isə Hirosima və Naqasakidə olduğu kimi dünyanın hər hansısa bir nöqtəsində o faciə təkrarlana bilər. Ona görə də, beynəlxalq qurumlar müşahidəçi mövqe tutmamalıdırlar. Bu gün dünyada çoxsaylı münaqişə ocaqları, milli münaqişələr var. Bu da ona əsas verir ki, hər an hər şey ola bilər. Nüvə silahına nəzarət əvvəlki illərə nisbətən indi zəifləyib. Bilmirəm niyə, ancaq indi əvvəlki kimi nüvə silahına nəzarət hiss olunmur".

Səxavət Məmməd
Ölkə.Az