"Bu son deyil"
"Çox əfsus ki, referendumun keçirilməsini əngəlləyə bilmədik. Təbii ki, qüvvələr nisbəti çox fərqlidir. Hakimiyyətin əlində bütün inzibati resurslar var. Müxalifətin isə imkanları, əslində daha geniş və güvənlidir. Bu da xalqın dəstəyidir. Çox əfsuslar olsun ki, xalqın da dəstəyi yetərli deyil. Bunun da günahkarı xalq yox, elə siyasətin adiləşməsində və müxalifətə inamın qırılmasında rol alan şəxslərdir. Xalq ayaqlansa, yəni gələcəyə inansa və etiraz etsə, heç bu qədər də çətinliklər yaşamazdıq".
Azərbaycan Xalq Cəbhəsi Partiyasının sədri Razi Nurullayev konstitusiyaya dəyişiklik üzrə keçirilən referendum Ölkə.Az-da münasibət bildirib. Sədrin sözlərinə görə, seçkini baykot edənlər əslində hakimiyyətin dəyirmanına su tökmüş oldular:
“Xalq seçkini də boykot etdi. Bəziləri üçün bu düzgün qərardır, bəziləri üçün sevindiricidir, bəziləri üçün isə imkandır. İmkan hakimiyyət üçündür. Seçici səsverməyə gəlməyəndə, inzibati üsullar işə düşür və bu da yalnız hakimiyyətin maraqlarına cavab verir. Boykot düzgün qərar deyil. Əgər xalq bir nəfər kimi seçki qutularına axışsa və sonra da verdiyi səsə sahib çıxsa, nə saxtakarlıq olar, nə də buna cürət edənlər.
Referendum keçirildi və YAP istədiyi nəticəni aldı. Bu təbii ki, bizlər üçün bir faciədir. Amma, baş vermiş faciənin də illərlə yasını tutmaq bizə düşməz. Nə yaş senzinin götürülməsi, nə də prezidentlik müddətinin 7 illik olması bizim üçün faciə olmamalıdır. Dünyanın sonu deyil ki. Gün çıxmadan nələr doğar. Konstitusiya yenə də dəyişdirilə bilər, prezidentlik müddətsiz ola bilər, amma xalqın seçimi yox. Biz də planlarımızı xalqın istək və arzuları ilə uyğunlaşdırmağa çalışırıq. Zaman aparan iş olsa da, sonunda aydınlıq olacaqdır”.
“Referendum bitdi, amma bizim sonumuz deyil” deyən Razi Nurullayev bildirib ki, önümüzdə 2018-ci il Prezident seçkiləri var, bu seçkilərdə ciddi revanş götürmək üçün gözəl imkanlar olacaq:
“Ölkədə ağır sosial durum hökm sürür, banklar quldur fəaliyyətlərini davam etdirir və hakimiyyətin onların sağlamlaşdırılması üçün atdığı addımlar da sabun köpüyüdür. Belə bir vəziyyətdə, xalqın narazılığı pik həddə çatacaq.
Bundan başqa, hakimiyyətin iqtisadiyyatın diversifikasiyası və qeyri-neft sektorunun inkişafı ilə bağlı atdığı addımların gözlə görünən nəticəsi 2019-cu ildən azacıq da olsa görünə bilər. Görünən budur ki, sosial vəziyyət ağırlaşmaqda davam edəcək, neftin qiymətlərinin 60 ABŞ dollarına çatması belə büdcə boşluğunu doldurmaq və manatı diriltmək iqtidarında deyil. Manatın məzənnəsinin sabit saxlanılması üçün böyük pullar havaya sovrulur. Bunu, əslində başa düşmək olar. Əgər, bəzi ekspertlərin dediyi kimi, manatı bazarın öhdəsinə buraxsaq, bir dolların real qiyməti dörd manat olar. Bu prosesin baş verməsi insanları diri-diri qəbrə qoymaqdır.
Hədəf 2018-ci ilə kimi xalqla daha sıx təmasda olmaq, beynəlxalq təşkilat və güclərin Azərbaycan müxalifətinin gücünə və proqramına inamını artırmaq və növbəti seçkilərdə xalqın bir nəfər kimi iştirakını təmin etmək. Digər vəzifə isə, elə indidən hər seçki məntəqəsi üçün ən azı 5-6 sözünü deyə bilən müşahidəçi hazırlamaqdır. Müşahidəçilik institutu məhv olmaq üzrədir və onlarsız da seçkilərin azad və şəffaf keçməsini təmin etmək çətindir”.
AXCP sədri vurğulayıb ki, seçki məcəlləsinin dəyişdirilməsi zəruridir:
“Mərkəzi Seçki Komissiyasının hazırkı tərkibi də dəyişməsə çətinliklər qalacaq. Bu vəzifəyə nail olmaq üçün də qarşımızda duran vəzifə Avropa Şurası və Venesiya Komissiyası ilə daha yaxından işbirliyi qurmaqdır.
BMT-ni də unutmaq olmaz. Seçki proseslərinə BMT-nin də töhvəsi ola bilər, BMT xətti ilə nələrə nail olmaq olar sualları çərçivəsində də müzakirələr aparmaq üçün hazırlıqlar olmalıdır. Bu barədə düşünürük və ictimaiyyətə də bu barədə məlumatlar verəcəyik.
Vətəndaş cəmiyyəti də çox zəiflədilib. Tutarlı, güclü və qərəzsiz vətəndaş cəmiyyəti olmadan da 2018-ci il seçkilərində nəticə əldə etmək çətin ola bilər. Digər vəzifəmiz vətəndaş cəmiyyətinin üzərində olan maneələrin aradan qaldırılması üçün məsləhətləşmələrin aparılması və bu sahədə beynəlxalq təşkilatlarla da daha yaxından əməkdaşlıq etməkdir”.
