\"Dağlıq Qarabağ problemini həll edəcəyik\"- kimi fikirlər boş-boş sözlərdir

ATƏT-in Minsk qrupunun amerikalı həmsədri Ceyms Uorlik bildirib ki, ABŞ Dağlıq Qarabağda sülh prosesinə sadiqdir və tərəflər üçün qəbul edilən həll yolunda vasitəçilik etmək üçün ATƏT həmsədrləri ilə fəal şəkildə çalışacaq.

Bir neçə gün öncə isə ABŞ-ın dövlət katibi Con Kerri, Dağlıq Qarabağ münaqişəsinin həllinin hazırda mümkünsüz olduğunu və ölkə liderlərinin buna hazır olmadığını vurğulayıb.

Aprel hadisələrindən sonra Rusiya və ABŞ-ın təşəbbüsü ilə prezidentlərin görüşü keçirildi, Rusiya prezidenti Putin bu münaqişəni şəxsən həll edəcəyini bildirdi. Hazırda isə danışıqlar demək olar ki, tamamilə dayandırlıb.

Millət vəkili Araz Əlizadə ABŞ rəsmilərinin Dağlıq Qarabağ münaqişəsi ilə bağlı səsləndirdiyi fikirlərə və Azərbaycanın hansı addımları atacağı ilə bağlı  Ölkə.Az-a münasibət bildirib:

"ABŞ açıq-aydın bildirir ki, Dağlıq Qarabağ problemi ilə bağlı hazırki status-kvo onu qane edir. Azərbaycan da, Ermənistan da Dağlıq Qarabağ münaqişəsinə görə, asılı vəziyyətdə qalırlar. ABŞ üçün bütün dünya ondan asılı olsa, bir o qədər yaxşıdır. Onları nə ədalət, nə də bu regionda sülh və əminamanlıq maraqlandırır. Bu cür münaqişə varsa, bu o deməkdir ki, istənilən anda müharibə başlaya bilər. Bu isə ABŞ-a sərf edir.

ABŞ-ın dövlət katibi Con Kerrinin Azərbaycan və Ermənistan liderlərinin bu məsələni həll etməyə hazır olmadığını deməsi onu göstərir ki, bu günə qədər Putin, Obaman və Ollandın "Dağlıq Qarabağ problemini həll edəcəyik"- kimi fikirlər səsləndirməsi boş-boş sözlərdir".

Azərbaycanın bu məsələdə hansı mövqe tutması ilə bağlı millət vəkili bildirdi ki, Azərbaycan heç nəyə baxmadan ordusunu gücləndirməlidir:

"Cəmiyyət prezidentin ətrafında sıx birləşməlidir. Öz vətəndaşlarına arxalanan ali baş komandan bu məsələni müharibə yolu ilə həll etməlidir".

Səxavət Məmməd
Ölkə.Az