“Kerrinin bəyanatı Ermənistanı işğalçılığı davam etdirməyə sövq edir”

Türkiyə Böyük Millət Məclisinin (TBMM) keçmiş sədri, parlamentin hakim Ədalət və İnkişaf Partiyasının (AKP) Ankaradan seçilən deputatı Cəmil Çiçək ABŞ-ın dövlət katibi Con Kerrinin Dağlıq Qarabağ münaqişəsinin həlli ilə bağlı səsləndirdiyi fikirləri şərh edib.

C.Çiçək Ölkə.Az saytına eksklüziv açıqlamasında deyib ki, Con Kerrinin bu fikirləri Azərbaycana qarşı haqsız və ədalətsiz bəyanatdır:

“Dağlıq Qarabağ münaqişəsinin həll olunmasına yeganə əngəl yaradan və haqsız olan tərəf Ermənistandır. Çox təəssüf ki, beynəlxalq ictimaiyyət də işğalçı Ermənistanın yanında dayanıb. Əgər belə olmasaydı, 20 ildən çox bir müddətdə Azərbaycan torpaqları hələ də işğal altında qalmazdı”.

Sabiq spiker qeyd edib ki, Con Kerrinin məlum bəyanatı həm də ABŞ-da noyabrın 8-də keçiriləcək prezident seçkilərinə hesablanıb:

“Gələn ay ABŞ-da seçkilər keçiriləcək. Bilirsiz ki, ABŞ-da güclü erməni lobbisi fəaliyyət göstərir. Həmin erməni lobbisinin ABŞ siyasətində müəyyən qədər gücünün olması danılmazdır. Con Kerrinin bu cür reallıqdan uzaq bəyanatı da məhz həmin erməni lobbisinin qazanılmasına xidmət edən açıqlamalardır. Ancaq mən bu cür reallıqdan uzaq bəyanatları əsla doğru addım hesab etmirəm. Əlsində, bu cür açıqlamalar münaqişənin həlli prosesini daha da yubandırmağa xidmət edir”.

Prezident İlham Əliyevin noyabrın 7-də keçirilən Nazirlər Kabinetinin iclasında Dağlıq Qarabağ münaqişəsinin həlli ilə bağlı səsləndirdiyi fikirlərə də toxunan C.Çiçək vurğulayıb ki, ABŞ ATƏT-in Minsk Qrupunun həmsədr ölkələrindən biridir:

“Cənab İlham Əliyev də çox düzgün vurğulayır. Bu cür bəyanatlar Azərbaycana qarşı böyük haqsızlıqdır. Bu cür qərəzli və ikili standartlara söykənən bəyanatlar Ermənistanı daha da qeyri-konstruktivliyə aparacaq və işğalın ömrünü daha da artıracaq”.

AKP-çi deputat bildirib ki, Dağlıq Qarabağ münaqişəsinin yaxın zamanlarda ədalətli həllinə işğalçı Ermənistan və onu müdafiə edən dövlətlər əngəl yaradır: 

“Bu baxımdan da münaqişənin yaxın zamanlarda həll olunacağını dəqiq deyə bilmərəm. Ancaq birmənalı olaraq deyim ki, Dağlıq Qarabağ münaqişəsi həll olunmadan Cənubi Qafqazda sülh və sabitlik mümkün deyil. Bundan ən çox ziyan görən ölkə də məhz Ermənistandır. Qarabağ münaqişəsi həll edilmədiyi üçün Ermənistanda əhali qalmayıb. Bunun üçün də münaqişənin tezliklə və ədalətli şəkildə həll olunması Ermənistana da böyük faydalar gətirər. Çox təəssüf ki, Con Kerri kimi dövlət rəsmilərinin bu cür bəyanatları Ermənistanı işğalçılığı davam etdirməyə sövq edir”.

Xatırladaq ki, ABŞ-ın dövlət katibi Con Kerri Dağlıq Qarabağ münaqişəsinin həlli ilə bağlı danışarkən bildirib ki, Azərbaycan və Ermənistan tərəfləri münaqişənin həllinə hazır deyillər.

Zaur Əziz
Ölkə.Az