Səfir: “Azərbaycanla əməkdaşlığın konkret nəticələr verəcəyinə inanıram”

“Avropa İttifaqı ilə Azərbaycan arasında əməkdaşlığın yeni hüquqi çərçivəsinə dair danışıqlar davam edir”.

Ölkə.Az saytının məlumatına görə, bunu Avropa İttifaqının Azərbaycandakı Nümayəndəliyinin rəhbəri, səfir Malena Mard bu il sentyabrın 30-da “Avropa Parlamenti ilə Milli Məclis arasında əməkdaşlıq məsələləri haqqında” qərar layihəsinin müzakirə edilərək qəbul edilməsinə münasibət bildirərkən deyib.

M.Mard Avropa Parlamenti ilə Azərbaycan arasında əməkdaşlığın da tezliklə bərpa olunacağına ümid etdiyini söyləyib:

“Ümid edirəm ki, tezliklə üzv ölkələr qərar verəcək və danışıqlar başlayacaq. Ancaq hələlik danışıqlar davam edir”.

Səfir həmçinin bildirib ki, bu gün Azərbaycanla Avropa İttifaqı arasında alt komitələrin 3-cü iclası baş tutub:

“Sabah 4-cü alt komitənin iclası keçiriləcək. İki həftə bundan əvvəl ticarət və iqtisadiyyat alt komitəsinin iclası keçirilib. Hesab edirik ki, bu komitələrin iclası vasitəsi ilə azərbaycanlı həmkarlarımızla çox vacib məsələlərə dair fikir mübadiləsi aparmaq imkanı əldə edirik. Çox şadam ki, biz bu dialoqu yenidən başlamışıq. İlin sonuna yaxın nəqliyyata aid çox vacib məsələləri əhatə edən enerji alt komitəsinin iclasının keçiriləcəyinə ümid edirik. Azərbaycanla əməkdaşlığın müxtəlif sahələrinə dair konkret nəticələr verəcəyinə inanıram”.

Zaur Əziz
Ölkə.Az