"Sabah ABŞ və Rusiya Dağlıq Qarabağın müstəqilliyini də tanıya bilər"
Aprel döyüşlərində ordumuzun əldə etdiyi uğurlu nəticələrdən sonra xüsusən də Rusiya Azərbaycanı döyüşləri dayandırmağa məcbur etdi.
Döyüşlər dayandıqdan sonra isə Rusiya tərəfi bildirdi ki, yaxın zamanda Dağlıq Qarabağ problemini həll edəcək. Rusiya məsələ ilə bağlı həll yollarını təklif etdi, prezidentlərin görüşünü keçirdi. Son zamanlar isə danışıqlar dayandırılıb.
Danışıqların dayandırılması ilə yanaşı, ABŞ-ın dövlət katibi Con Kerri, ardınca isə Rusiya prezidentinin köməkçisi Yuri Uşakov bəyan etdi ki, yaxın zamanda Dağlıq Qarabağ probleminin həll olunması gözlənilmir.
Baş verən proseslərlə bağlı hərbi ekspert Üzeyir Cəfərov Ölkə.Az-da öz fikirlərini bölüşüb:
"Rusiya Azərbaycandan üzr istəməlidir. Rusiya ona görə üzr istəməlidir ki, rəsmi Moskva faktiki olaraq Azərbaycanı aldatdı. Dağlıq Qarabağ problemi ilə bağlı üzərinə missiya götürən böyük bir dövlət Azərbaycana qarşı belə bir yol tutdu. ABŞ-ın bəyənatından sonra Rusiya prezidentinin köməkçisi Yuri Uşakov Dağlıq Qarabağ münaqişəsinin yaxın gələcəkə həll oluna biləcəyi ilə bağlı ümidlərinin olmadığını bildirdi. Başa düşmürəm ki, ümidi olmayan bir ölkə nəyə görə Azərbaycanın təbii və suveren haqqını tapdalayır? Hesab edirəm ki, Azərbaycanın siyasi və hərbi rəhbərliyi hər iki faktla bağlı sərt bəyanat verməlidir.
Faktiki olaraq Ermənistana kimlərin havadarlıq etdiyi bilinir. ATƏT-in Minsk qrupu ən azından ləğv olunmalıdır. Öncə ABŞ, ardınca Rusiya etiraf etdi ki, bu məsələni həll etmək iqtidarında deyillər, Fransanın mövqeyi isə əvvəldən bəlli idi. 2017-ci ildə BMT-yə yeni baş katib təyin olunacaq. Azərbaycan Pan Gi Mundan bir nəticə əldə etmədisə, ümid edirəm ki, Portuqaliyanın keçmiş baş naziri Antonio Quterreşdən bir nəticə əldə edəcək. Azərbaycan Antonio Quterreşdən Dağlıq Qarabağla bağlı qətnamələrin qüvvədə olub-olmaması ilə bağlı mövqe öyrənməyə çalışmalıdır. O qətnamələr qüvvəsindədirsə, niyə icra olunmur, niyə bunun icra mexanizmi yoxdur?
ABŞ və Rusiya bu bəyanatlarla açıq şəkildə heç nəyə qadir olmadıqlarını etiraf etdilər. ABŞ və Rusiya başqalarının bədbəxtliyi üzərində öz xoşbəxtliyini quran ölkələrdir, biz bir daha bunun canlı şahidi oluruq. Qarabağ müharibəsinin iştirakçısı, orada yüzlərlə dostlarını, yoldaşlarını itirən biri kimi hər iki dövlətə nifrətimi bildirirəm. ABŞ və Rusiyanın Dağlıq Qarabağla bağlı tutduqları mövqe həqarətdir.
Azərbaycan ATƏT-in Minsk qrupunun üzvləri, ABŞ, Fransa və Rusiyaya bildirməlidir ki, əgər siz bu məsələni həll edə bilmirsinizsə, çəkilin kənara, özünüzü rüsvay etməyin, özümüz bu məsələni həll edək. ABŞ, Fransa və Rusiya BMT ilə birlikdə özlərini rüsvay ediblər.
Bunu bir dəfə demişdim, yenə deyirəm, böyük dövlətlər Azərbaycana bağlı qapılar arxasında təzyiqlər göstərirlər. Son zamanlar görünür ki, böyük sayılan dövlətlər Azərbaycan xalqının, dövlətinin heysiyyatı ilə oynamağa başlayıblar.
Dağlıq Qarabağ məsələsi ilə bağlı çox təhlükəli məqam yaxınlaşır. Hər iki dövlət açıq şəkildə münaqişənin yaxın zamanda həll edilməyəcəyini bildirdilər. Sabah ABŞ və Rusiya Dağlıq Qarabağın müstəqilliyini də tanıya bilər".
Səxavət Məmməd
Ölkə.Az
