"Əslində Avropa İttifaqının məqsədi Rusiyanı dağıtmaqdır"

"Rusiyanın siyasəti Avropanı zəiflətməyə yönəlib"

Bu sözləri Avropa İttifaqının sədri Donald Tusk deyib. Donald Tusk bildirib ki, Kremlin strategiyası Avropanı dağıtmaqdır.

Rusiya və Qərb arasında gərginlik durmadan davam edir. Hər iki tərəf qarşılıqlı olaraq bir-birini ittiham edir. Artıq tərəflərin münasibəti soyuq müharibə dövrünü xatırladır.

Donald Tuskun Rusiya ilə bağlı səsləndirdiyi fikir və Rusiya-Avropa münasibəti barədə politoloq İlqar Vəlizadə Ölkə.Az-a danışıb:

"Rusiyanın belə bir planının olub-olmaması ilə bağlı dəqiq nə isə söyləmək mümkün deyil. Bu məxfi plan da ola bilər. Onu sübut etmək çox çətindir. Eyni zamanda, Avropa İttifaqının sədri Donald Tuskun açıqlamasını emosional açıqlama kimi qiymətləndirmək olar, nəinki real açıqlama. Rusiyanın Qərb siyasəti çox güman ki, Avropanı dağıtmağa hesablanmayıb. Bu çox mürəkkəb bir işdir. İnanmıram ki, Rusiya və yaxud başqa bir güc bunu edə bilsin. Bu qeyri-real bir şeydir.

İki tərərəfin münasibətinə baxdıqda problemlər mövcuddur. Problemlərə baxanda görünən odur ki, əslində Avropa İttifaqının məqsədi Rusiyanı dağıtmaqdır. Avropa İttifaqı durmadan Rusiyaya sanksiyalar tətbiq edir. Bu sanksiyalar nəticəsində Rusiya həm iqtisadi, həm siyasi risklərlə tez-tez üzləşir. İqtisadiyyatın bir çox sahələrində böhranlı vəziyyət əmələ gəlir.

Avropa İttifaqı və Rusiya arasında münasibətlərin düzəlməsi iki prinsipial məsələnin həllindən asılıdır. Bu, Ukrayna məsələsi və Rusiyanın Yaxın Şərq, Suriya siyasətindən çox şey asılıdır. Proseslər onu göstərir ki, yaxın müddətdə iki güc arasında münasibətlər düzəlməyəcək. Həm Rusiya, həm də Avropa İttifaqı bunu dərk edir. Sanki uzun müddətli soyuq müharibəyə hazırlaşırlar. Avropa İttifaqının sədri Donald Tuskun bu tip açıqlama verməsi bunu bir daha sübut edir".

Səxavət Məmməd
Ölkə.Az