Azərbaycanlı səfir Fransanı ermənipərəst dövlət adlandıranlara irad tutdu
Azərbaycanın Fransadakı səfiri Elçin Əmirbəyov ATƏT-in Minsk qrupuna Fransadan olan yeni həmsədr təyin edilməsini şərh edib.
Səfir E.Əmirbəyov Ölkə.Az-a açıqlamasında yeni həmsədrin fəaliyyətində müsbət fəallıq arzuladığını söyləyib:
“Çox inanmaq istərdik ki, Fransanın ATƏT-in Minsk qrupundakı yeni həmsədrinin mövqeyində müsbət dəyişiklik olsun. Ancaq bunu indidən dəqiq demək olmaz. Gərək fəaliyyətə başlasın, işini göstərsin. O, fərdi şəkildə həmsədr kimi fəallıq nümayiş etdirə bilər. Bunu isə zaman göstərəcək. İstənilən halda onun mövqeyi Fransa dövlətinin mövqeyidir”.
E.Əmirbəyov yeni həmsədr Stefan Viskontini şəxsən tanımadığını da bildirib:
“Mən onu tanımıram, onunla heç rastlaşmamışam da! Çünki Stefan Viskonti son 4 ildə Riqada səfir işləyib”.
Azərbaycanlı səfir Fransanın ermənipərəst mövqeli dövlət olması ilə bağlı səslənən fikirlərə də iradını bildirib:
“Fransa ilə bağlı səsləndirilən “ermənipərəst mövqeyi” müəmmalı fikirlərdir. Fransanın dövlət olaraq birmənalı şəkildə ermənipərəst mövqedən çıxış etməsi doğru deyil. Baxmayaraq Fransada xeyli erməni yaşayır, ancaq mən birmənalı olaraq Fransanın dövlət olaraq ermənipərəst olduğunu deyə bilmərəm. Ona görə də bu cür ifadələr düzgün deyil”.
Xatırladaq ki, ATƏT-in Minsk qrupuna Fransadan olan yeni həmsədr təyin edilib. Yeni həmsədr Fransanın Latviyadakı səfiri olmuş Stefan Viskontidir. O, bu vəzifədə Pyer Andreni əvəz edəcək.
Zaur Əziz
