Adil Əliyev rinqə çıxmasından

Azərbaycan Kikboks Federasiyasının prezidenti, millət vəkili Adil Əliyev İtaliyada keçiriləcək dünya çempionatı çərçivəsində rinqə çıxacağı yarışdan danışıb. 

Deputat A.Əliyev Ölkə.Az-a açıqlamasında bildirib ki, yarış oktyabrın 27-də baş tutacaq. Onun sözlərinə görə, oktyabrın 27-30-u tarixlərində İtaliyada kikboks üzrə həvəskar idmançılar arasında dünya çempionatı təşkil olunacaq:

“Həmin yarışda mən də iştirak edərək, Azərbaycanı təmsil edəcəm. Ancaq bu, peşəkar yarış deyil, həvəskar çempionat olacaq. İnşallah, ayın 27-də mən rinqə çıxacam”.

A.Əliyev rəqibləri ilə bağlı gözləntilərini də açıqlayıb:

“Açığı, rəqiblərimin kimliyini oktyabrın 25-də İtaliyaya səfərə yola düşəndən sonra biləcəm. Yarış həmyaşıdlar arasında keçiriləcək. Yəqin ki, mən də öz yaşıma uyğun veteran idmançılarla rinqə çıxacam. Təbii ki, hamı kimi mən də rinqdə qalib gəlməyə çalışacam. Ancaq hər şeyi zaman göstərəcək. İndidən rəqiblərimin asan və ya güclü olduğunu demək mümkün deyil. Bu, həvəskar yarış olduğu üçün rəqibləri əvvəlcədən bilmək olmur”.

Zaur Əziz
Ölkə.Az