\"İraqı Türkiyəyə qarşı qızışdıran, buranı öz müstəmləkəsinə çevirmək istəyən dövlətlərdir\"

Türkiyə Mosulda quru əməliyyatlarına qatıla bilər.

Bu barədə Türkiyənin xarici işlər naziri bildirib ki, hər hansı bir təhlükə qarşısında Türkiyə bütün imkanlarından isifadə edərək quru əməliyyatına başlaya bilər.

Türkiyə qırıcı təyyarələri Mosul əməliyyatında iştirak edir. İraq tərəfi isə Türkiyəni bu əməliyyatlardan çəkindirməyə çalışır. İraqın baş naziri Abadi hətta bununla bağlı Türkiyəni BMT-yə şikayət etdiklərini bildirib. Bundan əlavə, bir müddət öncə isə Suriya Türkiyəyə öz ərazilərində havadan zərbələri dayandırmağı, əks halda türk qırıcılarını vuracaqları ilə bağlı xəbərdarlıq edib. Türkiyə hazırda iki cəbhədə, İraq və Suriyada anti-terror əməliyyatları həyata keçirir.

Türkiyənin iki cəbhədəki keçirdiyi əməliyyatlarla bağlı hərbi ekspert Üzeyir Cəfərov Ölkə.Az-a danışıb:

"İraqın baş naziri Abadi nə istədəyini heç özü də bilmir. Hər gün fikirini dəyişir, yeni-yeni fikirlər səsləndirir. Rusiyanın yumşaqlıq göstərməsi, ABŞ-ın da güclü təsiri ilə İraq hökuməti Türkiyənin Mosul əməliyyatında iştirakına qarşı çıxmağa başladı.

Mosulda Türkiyəsiz keçinə bilməyəcəklər və Türkiyə Mosulda olacaq. Bunun başqa yolu yoxdur. Bildiyimiz kimi Türkiyənin 4 ədəd F-16 qırıcı təyyarəsi Mosul əməliyyatında iştirak edir. Türkiyənin xarici işlər naziri Mövlud Çavuşoğlunun quru əməliyyatları ilə bağlı səsləndirdiyi fikri də adi bir fikir kimi qəbul etmirəm. Mosulda quru əməliyyatları labüddür və bu olacaq. Orada isə Türkiyəsiz əməliyyat keçirmək mümkün olmayacaq. Çünki Türkiyənin orada həm marağı var, həm də həmin ərazidə qan qardaşlarımız var. Ona görə də, Türkiyə mütləq mənada orada olmalıdır və olacaqdır.

İraqın Türkiyə ilə bağlı mövqeyinə gəldikdə isə, bu, İraq hökumətinin öz fikri deyil. İraqı qızışdıran, İraqda daha çox paya sahib olmaq istəyən qüvvələrin rəsmi Bağdadın dili ilə səsləndirdiyi fikirlərdir. Türkiyə də rəsmi şəkildə bəyan edib ki, rəsmi dəvət olarsa türk ordusu əməliyyatlarda iştirak edəcək. Türkiyə həm İraqda, həm də Suriyada terrorçulara qarşı mübarizədə qalib gələ bilər. Türkiyənin bunu bacarmağa gücü var. Bəzi ölkələr, xüsusən də İran Türkiyəni bu əməliyyatlardan çəkindirmək üçün müxtəlif bəyanatlar səsləndirir. Həsən Ruhani bildirdi ki, Türkiyənin Mosul əməliyyatlarında iştirakı çox təhlükəlidir. Türkiyənin müdaxiləsi yolverilməzdir. Prinsip etibarı ilə nə desələr də artıq Türkiyə proseslərin içərisində var və heç nədən çəkinmədən bu məsələni çözməyə hazır və qadirdir.

Maraqlıdır ki, min kilometrlərlə uzaqdan dövlətlər gəlib İraq, Suriya məsələsinə qarışa bilirlər, ancaq hər iki dövlətlə qonşu olan ölkə nəyə görə kənarda qalmalıdır? Hesab edirəm ki, Türkiyə bir qədər çevik, sərt diplomatiya həyata keçirməlidir. Türkiyə üç addım önü görməlidir. Onsuz da sonsuza qədər orada proseslər davam etməyəcək. Türkiyə bu proseslərdən zərrə qədər kənarda qalmamalıdır, əksinə bu proseslərin içində və önündə olmalıdır. Türkiyə türk dünyasının güvəndiyi bir ölkədir. O, həm Suriyada, həm də İraqda olmalıdır. Bu, Türkiyənin milli maraqlarından irəli gələn bir məsələdir. Bölgədə Türkiyənin rolu xüsusi, qırmızı xəttlə keçməlidir. Bəzi dövlətlər özlərini hegemon sayaraq bəzi proseslərdən Türkiyəni kənarda qoymaq istəyirlər. Türkiyə isə geri addım atmamalıdır".

Səxavət Məmməd
Ölkə.Az