Azərbaycan İsraildə səfirlik açır

Yaxın vaxtlarda Azərbaycanın İsraildə səfirliyinin binasının açılması gözlənilir.

Bu barədə Ölkə.Az-a diplomatik mənbədən məlumat verilib.

Məlumata görə, səfirliyin açılması istiqamətində hazırda danışıqlar gedir.

Məsələ ilə bağlı Milli Məclisin Azərbaycan-İsrail Parlamentlərarası Əlaqələr üzrə İşçi Qrupunun rəhbəri, yəhudi əsilli deputat Yevda Abramov fikirlərini açıqlayıb.

Y.Abramov Ölkə.Az-a açıqlamasında bildirib ki, Azərbaycanın İsraildə səfirliyinin açılması məsələsi hər zaman gündəmdədir:

“Bu məsələ cənab Prezidentin stolunun üzərindədir və hər zaman gündəmdə qalır. İnşallah yaxın zamanlarda Azərbaycanın İsraildə də səfirliyi açılacaq. Azərbaycanın Qarabağla bağlı uğurları davam etdikcə, ölkəmizin İsraildə səfirliyi də fəaliyyətə başlayacaq”.

Y.Abramov həmçinin deyib ki, İsrail dövlətinin Azərbaycana verdiyi silahlar Ermənistanda böyük rezonans doğurub:

“İndi Ermənistan hakimiyyəti buna görə ciddi təşviş keçirir. Hətta, Ermənistanın müdafiə naziri mənim ünvanıma erməni xislətinə uyğun fikirlər səsləndirib. Ancaq İsraillə Azərbaycan arasında digər sahələrdə olduğu kimi, hərbi sahədə də əməkdaşlıq davam edir. Həmin silahların Azərbaycana verilməsi ilə bağlı məsələ də tam qaydasında gedir, hər şey normaldır”.

Yəhudi deputat vurğulayıb ki, yaxın vaxtlarda İsrail parlamentinin Azərbaycanla Dostluq Qrupunun üzvləri də Bakıya dəvət olunacaq:

“Mən bununla bağlı Milli Məclisin rəhbərliyinə təklif göndərmişəm və ona baxılacaq. Hazırda bu istiqamətdə işlər gedir. İnşallah biz İsrail parlamentində fəaliyyət göstərən Dostluq Qrupu üzvlərini Azərbaycana dəvət etmək istəyirik. Hər iki tərəf üçün danışıqlara, müzakirələrə ehtiyac var”.