"Rusiya nə qədər müqavimət göstərsə də NATO bildiyini edəcək"

NATO və Rusiya arasında gərginlik artan xətt üzrə davam edir.

Yaxın Şərqdə qarşılaşan tərəflər digər bölgələrdə də sakit dayanmırlar. Artıq NATO qoşunlarını Rusiya sərhədinə qədər gətirib çıxardıb. Belə ki, NATO-ya daxil olan ölkələrin əsgərlərindən ibarət beynəlxalq batalyon Polşanın şimalında yerləşdirilib və həmin qoşunlar Poşa və Litva arasındakı strateji dəhliz adlanan yolun mühafizəsini təşkil edəcəklər.

Rusiyanın isə buna hansı cavab verəcəyi maraqla gözlənilir.

Rusiya NATO arasındakı gərginliklə bağlı hərbi ekspert Üzeyir Cəfərov fikirlərini Ölkə.Az-la bölüşüb:

"Rusiya nə qədər müqavimət göstərsə də NATO bildiyini edəcək. NATO Rusiyanın nazı ilə oynamağa hazırlaşmır. Əksinə, NATO ilə Rusiya arasında olan gərginlik artan xətt üzrə gedir. Bunun da əsas səbəbkarı şimal qonşumuzdur.

Tərəflər arasında münasibət normal məcrada davam edirdi. Rusiya Ukraynada buraxdığı kobud səhvdən sonra etimadı və etibarını itirdi, qarşılığında da belə bir vəziyyət yaşandı. Baş verənlərə Rusiya nə qədər müqavimət göstərsə də, narahatçılığını bildirsə də, sonda NATO öz istəyinə nail olacaq. NATO-nun hazırlıqları boşuna deyil. Rusiya son zamanlar Ukrayna, Pribaltika ətrafına qoşunlar cəmləşdirir. NATO isə bunu cavabsız qoya bilməzdi.

Düzdür, tərəflər arasında diplomatik müharibə gedir, ancaq ola bilsin yaxın zamanda söz müstəvisindən konkret addımlara keçsin. Hadisələrin inkişafı onu deməyə əsas verir ki, tərəflər arasında gərginliklər artan xətt üzrə davam etməkdədir. Bunun sonu yaxşı nəticələnməyəcək".

Tərəflər arasında baş verən gərginliyin sonunun nə ilə nəticələnəcəyi ilə bağlı hərbi ekspert bildirdi ki, prinsip etibarı ilə hər şey ola bilər:

"Baş verənlərin böyük miqyaslı döyüşlərlə nəticələnə biləcəyini düşünmürəm. Ancaq hərarət artmaqda davam edir. Əvvəllər diplomatik fikirlər söylənilirdisə, artıq müəyyən addımlar atılır. Bu isə çox ağır nəticələrə gətirib çıxarda bilər".

Səxavət Məmməd
Ölkə.Az