"Hulusi Akarın Moskvaya səfəri bu məsələ ilə bağlıdır..."

Türkiyə ordusunun baş qərargah rəisi ordu generalı Hulusi Akar Moskvaya səfər edib.

Səfər zamanı iki ölkə arasında Suriyada baş verən əməliyatların kordinasiya edilməsi və terrorçulara qarşı birgə mübarizə barədə danışıqların keçiriləcəyi gözlənilir. Səfəri maraqlı edən əsas məsələlərdən biri isə Türkiyəli generalın 14 oktyabr tarixində ABŞ-a səfər etməsi və bu səfərdən 3 gün sonra Mosul əməliyyatı başlamasıdır.

Bəzi ekspertlər iddia edir ki, Rusiya və Türkiyə birgə Rakkaya hücum planı hazırlayırlar.

Türkiyə və Rusiyanın Suriyadakı əməkdaşlıqları və iki ölkənin baş qərargah rəislərinin görüşləri barədə politoloq İlqar Vəlizadə öz fikirlərini Ölkə.Az-la bölüşüb:

"İraq və Suriya iki fərqli cəbhədir. İki cəbhədə də fərqli prosslər gedir. İraq cəbhəsində kifayət qədər Qərb koalisiyası məhsuldar hərəkətlər edir. Biz görürük ki, Mosulda əməliyyatlar keçirirlər. Türkiyənin buraya qarışacağı bir şey yoxdur. Türkiyə bu əməliyyatlara seyirci kimi baxır.

Suriyada isə türklər konkret olaraq əməliyyatlarda iştirak edirlər. Türkiyə həm kürdlərə, həm də İŞİD-ə müəyyən dərəcədə müdaxilə edir. Suriyadakı əməliyyatlarda Rusiya da kifayət qədər fəaldır. Ötən il Türkiyə ilə Rusiya arasında toqquşma məhz əməliyyatları düzgün koordinasiya etməməkləri üzündən yarandı. Koordinasiyanın olmaması üzündən məlum təyyarə insidenti baş verdi. Hal-hazırda təxribat elementləri çoxalıb. Yenə də Rusiya ilə Türkiyə arasında toqquşma ehtimalları çoxalıb. Burada insident hər an baş verə bilər. Bu vəziyyət bir neçə həftədir ki, müşahidə olunur. Rusiyanın baş qərargah rəisinin də Türkiyəyə səfəri bununla bağlı idi. Türkiyənin baş qərargah rəisinin Moskvaya səfəri məhz bununla bağlıdır.

Əsas danışıq mövzusu ondan ibarətdir ki, təyyarə hadisəsinin üstündən 1 il keçib, Rusiya-Türkiyə münasibətləri düzəlib, ancaq iki ölkənin hərbiçiləri arasında işlək mexanizim yaranmayıb. Masa üzərində bir təklif var ki, iki ölkə arasında qaynar xətt fəaliyyət göstərsin. Hər iki ölkənin ordusu bu xətt vasitəsi ilə əlaqə yaratsın və insidentlərin baş verməsinin qarşısını ala bilsinlər. Bu xətt haqqında müxtəlif fikirlər, təkliflər var, ancaq xətt hələ də işlək vəziyyətdə deyil. Hulusi Akarın Moskvaya səfəri işlək mexanizmin yaranması ilə bağlıdır və Rusiyanın baş qərargah rəisinin Ankaraya səfərinin davamıdır. Düşünürəm ki, səfərdən sonra konkret addımlar görəcəyik".

Qeyd edək ki, Rusiya ordusunun baş qərargah rəisi ordu generalı Valeri Gerasimov isə sentyabr ayında Ankarada Hulusi Akar ilə görüşmüşdü.

Səxavət Məmməd
Ölkə.Az