\"Türkiyədə dövlət orqanlarında PKK-çı FETÖ-çüdən daha çoxdur\"

PKK terror təşkilatına yaxınlığı ilə bilinən HDP-nin lideri həbs edilib.

Səlahəddin Dəmirtaş və partiyanın həmsədri Figen Yüksəkdağ başda olmaqla Türkiyə parlamentinin daha 9 deputatı terrora dəstək verməkdə ittiham edilərək həbs ediliblər.

Bu əməliyyatın keçirilməsi gözlənilən idi. Belə ki, bir müddət əvvəl Türkiyə Parlamentində "deputatların toxunulmazlığı" haqqında qanun layihəsi ləğv edildi. Bu isə Türkiyə hüquq-mühafizə orqanlarına terrorla mübarizədə geniş imkanlar verdi.

Dəmirtaşın həbsi və HDP-yə qarşı əməliyyatlarla bağlı politoloq Qabil Hüseynli fikirlərini Ölkə.Az-la bölüşüb:

"Türkiyədə separatizmə qarşı mübarizədə çox ciddi taktiki xətalara yol verilib və ciddi zaman itkisi olub. Artıq HDP, onun lideri Səlahəddin Dəmirtaş və fəal üzvləri ciddi surətdə həm anti-türk fəaliyyəti aparırlar, həm türk dövlətçiliyinə qarşı mübarizə aparırlar, həm də kürd millətçiliyini və separatizmini hər yerdə təbliğ edirlər. HDP qapalı və açıq yerdə mitinqlər keçirir, ancaq dövlət buna qarşı bəzən acizlik nümayiş etdirir. Bu acizliyin bir səbəbi ondan ibarətdir ki, hüquq-mühafizə orqanları, məhkəmə, prokurorluq, xüsusən də polis və ordunun müəyyən hissəsi FETÖ-çülərlə mübarizə adı altında xeyli zəiflədilib.

FETÖ-çülərə qarşı mübarizə davam etdirilməklə yanaşı, orduda, polisdə, məhkəmə və prokurorluqda FETÖ-çü axtarışı dayandırılmalı, PKK-çı axtarışına başlanılmalıdır. Dövlətin müxtəlif orqanlarında PKK-çı daha çoxdur, nəinki FETÖ-çü. Türk olan FETÖ-çü inanmıram ki, vətənini satsın.

HDP mütləq bağlanılmalıdır. Təkcə 5-6 ay həbs partiyanın fəaliyyətinin tam dayanması demək deyil. Türkiyədə partiyaların bağlanılması proseduru var. Bu prosedur işə salınmalı və HDP bağlanmalıdır. Türkiyə Böyük Millət Məclisində onun təmsilçiliyi dayandırılmalıdır. Üstəlik bölgədə asayiş qüvvələrinin və xüsusi təyinatlıların yerləşdirilməsinə diqqət artırılmaldır. PKK-ya yardım edən adamlar da müəyyənləşdirilməli və ciddi surətdə cəzalandırılmalıdır.

Bundan əlavə, Türkiyə PKK-nın maliyyə kanallarını dayandırmalıdır. Xüsusən Almaniya və Hollandiyadan PKK-ya gələn maliyyənin qarşısı alınmalıdır. PKK-ya yardım göstərənlərdən bir çoxu Türkiyənin daxilində narkobizneslə məşğul olurlar. Türkiyə buna qarşı da mübarizə aparmalıdır. Türkiyə PKK-nın dayaq nöqtələrini məhv etməlidir".

Səxavət Məmməd
Ölkə.Az