"Türkiyəni daxildən sarsıdaraq bölgədə gedən oyundan çıxarmaq istəyirlər"

Türkiyə eyni zamanda həm daxildə, həm də xaricdə anti-terror əməliyyatları keçirir.

Türkiyə bir müddətdir ki, Suriyada İŞİD və PYD-yə qarşı əməliyyatlar həyata keçirir. Bundan əlavə, Türkiyə Mosul əməliyyatına da qoşulmaq istəyir. İki əməliyyatın keçirildiyi bir zamanda Türkiyənin daxilində PKK-nın fəallaşması sifariş kimi görünür. Türkiyə eyni zamanda həm daxildə, həm də xaricdə əməliyyatlar həyata keçirə biləcəkmi?

Bununla bağlı politoloq Zərdüşt Əlizadə Ölkə.Az-a danışıb:

"Dünya miqyasında və Yaxın Şərqdə böyük siyasi oyunlar gedir. Bu siyasi oyunlara həm də mühüm oyunçuların daxilində sabitliyin pozulması da aiddir. Bu da Türkiyədə həyata keçirilir. Burada heç bir qəribə şey yoxdur. Hər hansısa bir ölkə digəri ilə rəqabət aparanda çalışır ki, qarşı tərəfi daxildən sarsıtsın.

Türkiyənin atdığı addımlar aydındır. Türkiyə mövqeyini sərtləşdirib, güc amilinə üstünlük verir. Düşünürəm ki, bu, kökündən səhv addımdır. Əksinə barışı, ümumi həll variantının tapılmasını gücləndirməli idi. Türkiyə bunu etmədi. Gücə üstünlük verdi.

Türkiyənin eyni zamanda Suriya, İraq və daxildə əməliyyatlar aparması onun hərbi gücündən asılıdır. Əgər Türkiyənin hərbi gücü imkan versə ki, həm daxildə, həm də xaricdə hərbi əməliyyatlarda iştirak etsin, rəsmi Ankara buna gedəcək. Heç kəs türk ordusunun gücünə şübhə etmir, ancaq bu əməliyyatlara Türkiyənin iqtisadiyyatı, cəmiyyətin özü bu qədər mənəvi-psixoloji təzyiqə dözə biləcəkmi? Əsas məsələ budur".

Səxavət Məmməd
Ölkə.Az