Millət vəkili: "Əslində bizdə gülüş doğuran çıxış deyil, deyiliş forması oldu" - VİDEO

Dünən Milli Məclisin “Bələdiyyələrin statusu haqqında” Qanunun müzakirəsi zamanı maraqlı anlar yaşanıb.

Belə ki, deputat Qalib Salahzadənin “Artıq bələdiyyələr indidən seçilib, kim olacaq, camaat bilir", deməsi parlamentdə gülüşə səbəb olub. Həmin çıxışa gülənlərin sırasında millət vəkili Fazil Mustafa da olub.

Millət vəkili Ölkə.az-a təbəssümünün səbəbini açıqlayıb:

"Məni güldürən deyiliş üslubu oldu. Çıxışda deyiliş üslubuna gülmüşdüm, çünki o deyiliş forması olduqca cəsur çıxış idi. Əslində bizdə təbəssüm yaradan çıxış deyil, deyiliş forması oldu. Həm də sonda qiymətləndirməsi, bu bir az ənənəvi yanaşma deyildi. Çıxışdan sonra o sözü deməyi bizdə xeyli təbəssüm yaratdı. Tək məndə deyil, iclasda iştirak edən insanların əksəriyyətində təbəssüm yarandı".

Fazil Mustafa Qalib Salahzadənin bələdiyyələr haqqında səsləndirdiyi fikrə də münasibətini bildirib.

"Təbii ki, bir millət vəkilinin çıxışını şərh etmək doğru deyil, çünki çıxış sərbəstdir. İstənilən insan istənilən mövzuda fikirlərini ifadə etmək hüququna sahibdir. Hansı faktlara əsaslanaraq belə fikir söylənməsini müzakirə edəcək bir anlayışa sahib deyiləm. Yəqin ki, nəyəsə istinad edərək belə deyib. Onu da əlavə edim ki, biz özümüz də bu proseslərdə yaxından iştirak etsək də, hələ qanunpozuntusu ilə qarşılaşmamışıq".

Fatimə İbrahimova
Ölkə.az