\"Avropa tələb edir ki, terrorçuya yardım göstərəni mühakimə etmə...\"

Avropa İttifaqı ilə Türkiyə uzun zaman sonra yenidən müzakirələrə başlayıblar.

Müzakirələr zamanı isə Avstriya, Lüksemburq, Belçika və Hollandiya Türkiyənin Avropa İttifaqında yerinin olmadığını bildiriblər. İngilitərə, Polşa, Finlandiya, Çex respublikası və Baltikyanı dövlətlər isə Türkiyənin düşdüyü durumu nəzərə almaq lazım olduğunu bildiriblər. Hər zaman Türkiyənin Avropa İttifaqına qəbul edilməsinə qarşı çıxan Fransa və Almaniya dialoqların davam etdirilməsinin vacibliyini vurğulayıblar.

Avropa İttifaqı ilə Türkiyə münasibətləri barədə politoloq Qabil Hüseynli Ölkə.Az-a danışıb:

"Baltada varsa, sapında da var. Türkiyə Avropa İttifaqı ilə münasibətləri qurmağa sanki həvəsli görünmür. Türkiyə öz üzərinə müəyyən öhdəliklər götürüb, bu öhdəliklərin yol xəritəsi cızılıb, ancaq rəsmi Ankara bu öhdəlikləri yerinə yetirməkdə tələsmir.

Düzdür, Türkiyədən tələb edilən məsələlərin içərisində elələri var ki, yerinə yetirilməsi mümkün deyil. Avropa İttifaqı tələb edir ki, PKK yaraqlısı tutulubsa, ona yardım edən adam günahkar olmamalıdır. Faktiki olaraq PKK-nı bəsləyənlər, maliyyə yardımı edənlər cinayət məsuliyyətinə cəlb edilməməlidirlər.

Türkiyədə eyni zamanda çevrilişə cəhd hadisələri zamanı çoxlu sayda həbslər oldu. Avropa İttifaqı Türkiyənin insan hüquqları, demokratik dəyərlər məsələsində sinifdə qaldığını bildirdi. Bu məsələlərdə Türkiyə ciddi xətalara yol verdi. Türkiyə ilə Avropa İttifaqı arasında kriteriyalar, meyarlar məsələsində fərqli yanaşmalar var. Fərqli yanaşmalar üzündən meydana gələn ciddi fikir ayrılıqları var. Bununla da polemikalar başlayır, polemikalar hədələrə dönür və Ərdoğanın Avropa İttifaqının Parlament Assambleyasının rəhbəri Şultsa tərbiyəsiz deməsinə qədər böyüyür. Münasibətlər kifayət qədər gərgindir. Bəzi dövlətlər Türkiyəni NATO-nun, Avropanın for-postu hesab edir.

Türkiyə Avropa İttifaqına daxil olmaq məsələsinə prioritet məsələ kimi baxmalıdır. Artıq tərəflər arasında qarşılıqlı ittihamlar o dərəcəyə çatıb ki, bundan sonra Türkiyənin Avropa İttifaqına girə bilmə məsələsi bir xeyli çətin görünür. Türkiyənin siyasi rəhbərliyi, başda Ərdoğan olmaqla bu məsələ barədə diplomatik etiketləri kənara ataraq Avropanı günahlandırıcı, təhqiredici jarqonlarla danışırlar. Belə görünür ki, Türkiyənin özü də Avropa İttifaqına girə bilməyəcəyini anlayıb".

Səxavət Məmməd
Ölkə.Az