"Trampın arxasında dayanan dairələrin sifarişindən çox şey asılıdır"
Vladimir Putinlə ABŞ-ın yeni seçilmiş prezidenti Donald Tramp arasında olan telefon danışığı Avropa İttifaqının rəsmiləri tərəfindən birmənalı qarşılanmayıb.
Donald Tramp Rusiya lideri ilə beynəlxalq məsələlər mövzusunda daha sıx əməkdaşlıq edəcəyinə söz verib. Donald Tramp və Putinin telefon danışığı iki ölkə arasında yaranmış soyuq münasibətlərin bitəcəyi kimi qiymətləndirilir.
Yeri gəlmişkən, Donald Tramp seçki dövründə Rusiya ilə münasibətləri normallaşdıracağını bildirmişdi.
Avropa İttifaqı isə ABŞ-Rusiya münasibətlərinin normallaşmasından narahatdır. Aİ rəsmiləri ABŞ-ın Rusiya ilə yaxınlaşması nəticəsində rəsmi Vaşinqtonun Avropa siyasətinin ikinci plana keçəcəyindən qorxurlar.
Politoloq İlqar Vəlizadə yeni dövrün başlaması barədə öz fikirlərini Ölkə.Az-la bölüşüb:
"Yeni dövrün başlaması üçün müəyyən zəmin lazımdır. Rusiya prezidenti də deyib ki, münasibətlərin düzəlməsi üçün hər şey konkret addımlardan asılı olacaq. Putin də başa düşür ki, Tramp da addımlar atmaq üçün müəyyən dairələrlə razılaşmalı olacaq. Respublikaçıların daxilində gedən prosesdən və Trampın arxasında dayanan dairələrin sifarişindən də çox şey asılıdır. Tramp müəyyən vədlər verib. Yeni prezidentlə yanaşı hakim kürsülərdə respublikaçılar da oturacaq.
Bilirik ki, respublikaçılar demokratlara nisbətən sərt siyasət aparmağa üstünlük verirlər. Tarix göstərir ki, adıçəkilən partiyanın nümayəndələri xarici siyasətdə daha fəal olurlar. İki dövlətin fəal xarici siyasətinin nə ilə nəticələnəcəyi müəmmalıdır. Trampın administirasiyası hələ də hakimiyyətə gəlməyib. Hazırda ABŞ-da keçid dövrüdür. Müxtəlif bəyanatlar verilir, ancaq hələ ki, Tramp səlahiyyətləri tam ələ keçirməyib. O, səlahiyyətləri ələ aldıqdan sonra real vəziyyətdən çıxış edə biləcək. Respublikaçılar da praqmatik olurlar. Ona görə də, iki dövlət arasındakı münasibətlərdən irəliləyiş gözləmək olar".
Rusiya ilə ABŞ münasibətlərinin yaxşılaşmasından Avropa İttifaqı narahat olmalıdırmı sualına cavab olaraq politoloq bildirib ki, Avropa öz vəziyyətindən narahat olmalıdır:
"Obama dövründə ABŞ-Avropa münasibətləri heç də normal səviyyədə deyildi. FTB Avropanın ali rəsmilərinin telefonlarını dinləmişdi və bu, skandala çevrilmişdi. Avropa İttifaqı ilə ABŞ, Kanada arasındakı ticari sahədə müttəfiqlik havada qalmışdı. Trampın hakimiyyətə gəlməsi ilə bu məsələlər öz həllini tapa bilər. Ümid var ki, müəmmalılıq dövrü geridə qalacaq və konkret addımlar atılacaq.
Yenə də hər şey hadisələrin gedişindən asılıdır".
Səxavət Məmməd
Ölkə.Az
