\"Ermənistan məğlub oldu, İlham Əliyev isə mövqeyini möhkəmləndirdi\"

"Ermənistan əvəzində Dağlıq Qarabağı almaq, iqtisadi səmərə, o cümlədən, Rusiya enerji daşıyıcılarının qiymətinin düşməsi, erməni iqtisadiyyatına böyük sərmayə ümidi ilə Rusiyadan tam asılılığını könüllü seçib və bunun müqabilində məğlub oldu!"

Ölkə.Az xəbər verir ki, Londonun "Jane's İntelligence" analitika mərkəzinin müdafiə və təhlükəsizlik məsələləri üzrə aparıcı mütəxəssisi Lilit Qevorkyan 168.am-a verdiyi müsahibəsində deyib. Analitik Yerevanın Moskvadan belə bonus ümidlərini birbaşa olaraq "Ermənistan hakimiyyətinin ciddi xarici siyasət səhvi" adlandırıb.

Qevorkyanın fikrinə görə, Azərbaycanın Rusiya və İranla münasibətlərini inkişaf etdirdiyi və Ermənistandan fərqli olaraq etibarlı partnyor olduğunu göstərdiyi bir dövrdə Ermənistan Rusiyanın regionda yeganə strateji müttəfiqi postuna iddia edə bilməz. 

"Qarabağ münaqişəsi üzrə danışıqlar prosesi davam etdiyi təqdirdə Azərbaycan müharibə təhlükəsini səmərəli formada istifadə edəcək. Yaranmış vəziyyətdə Ermənistan zəif və təklənmiş dövlətə çevrilir. Moskva Ermənistanın maraqları hesabına Azərbaycanla münasibətlərini möhkəmləndirəcək", - deyən Qevorkyan buna şübhə etmir.

"Ermənistanın apardığı xarici siyasətlə rəsmi Yerevan boş yerə Qərbdən dəstək gözləyir", deyə politoloq qeyd edir: "Əgər Ermənistan Rusiyanın strateji müttəfiqidirsə, erməni hakimiyyəti, müxalifəti və demək olar ki, bütün dövlət sistemi Avrasiya inteqrasiyasını üstün tutursa, nəyə görə Qərb Ermənistana kömək etmək üçün resurslarını xərcləməlidir. Faktiki olaraq Ermənistanın dünyada müttəfiqi yoxdur".

Azərbaycanın bu günkü vəziyyətini analiz edən Qevorkyan dünya bazarlarında neftin qiymətinin aşağı düşməsi fonunda da böyük enerji resurslarına sahib dövlətin hələ də Qərbin strateji partnoyu kimi qalmağına diqqət çəkir:

"Azərbaycan dünya enerji bazarının konyukturundan istifadə edərək mövqeyini möhkəmləndirir. Bu təsadüfi yox, Azərbaycan hakimiyyətinin məntiqli və balanslaşdırılmış xarici siyasətinin nəticəsidir".

Analitik Ermənistanın təcrid olunmasını təsadüfi saymır. Bu təcridi rəsmi Yerevanın dövlət siyasəti ilə birbaşa əlaqəndirir:

"Təbii ki, Ermənistanın regionda belə mövqeyi digər ölkələr üçün iqtisadi cəlbediciliyinin itirilməsinə gətirib çıxarıb. Ermənistan Azərbaycandan fərqli olaraq Rusiya biznes mühiti üçün də cəlbedici deyil. Rusiyanın yeqanə məqsədi Ermənistanda strateji obyektlərini qoruyub saxlamaqdır. Bu faktorlardan istifadə edən rəsmi Bakı uğurlu xarici siyasət yürüdür", - deyə ekspert əminliklə qeyd edib. 

Rusiya Qarabağ münaqişəsinin tənzimlənməsində aparıcı rolunu qorumağa, əsas sülhməramlı olmağa çalışacaq. Politoloqun fikrinə görə, bu fonda müharibə riski çox yüksəkdir. Müharibə yenidən alovlansa, Ermənistan məğlub olacaq. Ermənistanın dövlətçiliyinə dərin təsir edən Rusiya ilə hərbi inteqrasiyası isə Dağlıq Qarabağ üzərində nəzarətin saxlanmasına təminat vermir:

"Aprel müharibəsindən sonra prezident İlham Əliyev siyasi mövqeyini ciddi formada gücləndirib. Çünki o, müəyyən əraziləri qaytaran ilk prezidentdir. İlham Əliyev sübut etdi ki, erməni ordusu heç də məğlubedilməz deyil və Azərbaycan ordusunun son illər müasirləşməsi məsələsində effektliyi nümayiş etdirdi", Qevorkyan əlavə edib.

Erməni tərəfinin indiki xarici siyasəti yürütməyə davam etdiyi təqdirdə müharibə və böyük itkilər riski olduğu kimi qalacaq. Qevorkyan nəticə çıxarır ki, hərbi və iqtisadi inteqrasiyanı başa çatdırmağı planlaşdıran rəsmi Yerevan Rusiyanın strateji müttəfiqi qalmaqda davam edir. Amma rəsmi Moskvanın erməni planlarında Dağlıq Qarabağın yeri yoxdur.

Hikmət
Ölkə.Az