"Trampın yeni komandasında anti-Rusiya meyilli adamlar üstünlük təşkil edir"
Tramp Rusiyanı təəccübləndirdi.
Seçki dövründə Rusiya ilə münasibətləri qaydaya salacağını deyən, hətta buna görə Rusiyapərəst adlandırılan Donald Tramp bildirib ki, Rusiya ilə münasibətlərə yenidən baxmaq mənasızdır.
Tramp bildirib ki, Putinlə münasibətləri qaydaya salmaq yaxşı olardı, amma siyasi müstəvidə olan münasibətlərə yenidən baxmağa lüzum yoxdur. Baş verən bütün hadisələrdən sonra bu haqda danışmaq belə yersizdir. Vacib olan isə Suriyada baş verən sərsəmliyə və biabırçılığa son qoymaqdır.
Trampın bu çıxışından sonra iki dövlət arasında münasibətlərin necə olacağı maraqla gözlənilir.
Trampın Rusiya barədə səsləndirdiyi fikir və iki dövlət arasında gözləntilənlərlə bağlı politoloq Qabil Hüseynli Ölkə.Az-a danışıb:
"Bu gözlənilməz bir hadisə olmadı. Bundan əvvəlki şərhlərimdə də qeyd edirdim ki, ABŞ-ın ənənəvi siyasəti var. Bu siyasəti heç kəs dəyişdirə bilməz. ABŞ-da prezident təkbaşına, hökm, fərman sahibi deyil. Onun fəaliyyətini çərçivəyə salan müxtəlif qurum və rıçaqlar var. Üstəlik seçkiqabağı verilən vədlərə hakimiyyətə gəldikdən sonra əməl etmək məcburiyyəti yoxdur. Burada real siyasət üstün rol oynayır.
Trampı artıq cilalayırlar. Bu cilalama prosesində dərin dövlətin bütün strukturları çox fəal iştirak edir. Təsadüfi deyil ki, Trampın yeni komandasında anti-Rusiya meyilli adamlar üstünlük təşkil edir. Hətta Trampın vitse prezidenti Rusiyaya barışmaz mövqeyi ilə tanınan şəxsdir.
Rusiyanın əzələ nümayişi, başqa dövlətlərə təhdidləri ABŞ tərəfindən həzm edilməyəcək. ABŞ neçə illərdir ki, dünya düzənini təyin edən dövlət kimi çıxış edir. Respubilkaçıların Rusiyaya qarşı siyasəti həmişə daha sərt olub və Tramp bu ənənəni davam etdirmək məcburiyyətində qalacaqdır. Ola bilsin ki, Putinin əleyhinə yeni ittihamlar səsləndiriləcək. Tramp hələki fikrində 50-60% dəyişiklik edib, ancaq innaqurasiya mərasimindən sonra Trampın anti-Rusiya, anti-Putin bəyanatlarını eşidəndə təəccüblənməyəcəyik.
Yaxın Şərqdə ABŞ-ın maraqları var və İsrailin maraqlarının keşiyində də ABŞ durur. Bu bölgədə ABŞ-a böyük təhlükə törədə biləcək İran var. ABŞ Suriya məsələsində zərrə qədər də güzəştə getməyəcək. Artıq Rakkaya ediləcək hücumların detalları açıqlanır. Həmin hücumda Türkiyənin iştirakı ilə ABŞ Rakkanı ələ keçirəcək. Rusiyaya xəbərdarlıq edilib ki, hər hansısa bir qarşıdurma yaratmağa cəhd edilsə, bu zaman onlara qarşı sərt tədbirlər görüləcək.
Bütün bunlardan görünür ki, Rusiya ilə ABŞ arasındakı münasibətlərin yumşalması yox dərəcəsindədir. Əksinə, bu münasibətlərin daha da kəskinləşəcəyini proqnozlaşdırmaq olar. Trampın da bu prosesdə anti-Rusiyaçı bir prezidentə çevriləcəyinin şahidi olacağıq".
Səxavət Məmməd
Ölkə.Az
