"Rusiya terrorçularla heç bir danışığa getməyəcək"

Suriya hökuməti Hələb şəhərini ələ keçirmək üçün uğurlu əməliyyatlar həyata keçirir.

Əməliyyatların uğurla davam etməsindən sonra Avropa İttifaqı Bəşər Əsədə maliyyə yardımı edə biləcəyini bildirib. ABŞ tərəfi isə bildirib ki, Hələbin terrorçulardan təmizlənməsi Suriya probleminin həlli demək deyil. Problem siyasi müstəvidə həll olunmalıdır.

Rusiyanın Xarici İşlər naziri Sergey Lavrov isə qeyd edib ki, Hələbin cənub hissəsini tərk etməyən bütün terrorçu qruplaşmalar məhv ediləcək. Xarici siyasət idarəsinin rəhbəri deyib: "Terrorçular döyüşməkdən imtina etmək barədə danışsalar da, bu, formal xarakter daşıyır. Sözdə hər şeyi demək olar. Amma konkret bir müqavilə imzalanmayıbsa və onlar şəhəri tərk etməyibsə başqa çıxış yolumuz yoxdur. Son terrorçuya qədər məhv ediləcək".

ABŞ-la Rusiyanın Suriyada toqquşan mövqeyini politoloq İlqar Vəlizadə Ölkə.Az-a şərh edib:

"Lavrov rəsmi Moskvanın xarici siyasətinin konsepsiyasını rəhbər tutaraq belə bəyanatlarla çıxış edir. Rusiya xarici siyasətinin konsepsiyasında açıq-aşkar göstərilib ki, Rusiya Suriyada terrorçularla mübarizə aparacaq, mövcud hakimiyyəti dəstəkləməklə məşğul olacaq. Həmin məqsədlərdən çəkinməyəcək. Rusiyanın Yaxın Şərqdə apardığı əsas siyasi kurslardan biri də budur.

Rusiyanın daxilində də terrorçularla ümumiyyətlə danışıqlar aparmamaq barədə siyasət həyata keçirilir. Rusiya hansısa təşkilatı, şəxsi terrorçu hesab edirsə, onlarla güc, silah yolu ilə danışır. Şimal qonşumuz, mütləq həmin terrorçuları aradan götürmək üçün çalışır. Putin də bildirib ki, terrorçularla ancaq silah dili ilə danışmaq olar. Rusiya Suriyada da bu taktikadan istifadə edir. Rəsmi Moskva terrorçularla heç bir danışığa getməyəcək.

ABŞ Rusiyadan fərqli olaraq oradakı qruplara başqa gözlə baxır. Rəsmi Vaşinqton onların bir hissəsini terrorçu hesab etmir, onları müxalifət qrupu kimi qəbul edir. Ona görə də, onlara dəstək olur.

Belə bir vəziyyətdə tərəflərin fikir ayrılığı qaçınılmazdır. İndiki şəraitdə Hələblə bağlı heç bir razılaşma mümkün deyil. Yalnız humanitar yardım və yerli sakinlərin təhlükəsizliyi ilə bağlı olan məsələlərdə razılaşma əldə edilə bilər. Burada da müəmmalı məsələlər var. ABŞ çalışır ki, razılaşma əldə edilsə, Bəşər Əsədə qarşı vuruşan qruplara da yardım edilsin. Rusiya isə onun əleyhinə çıxacaq".

Səxavət Məmməd
Ölkə.Az