"Suriya da keçmiş SSRİ-nin viran qoyduğu Əfqanıstanın gününə düşəcək"

Suriya ordusu Hələbdə uğurlu əməliyyatlar keçirir.

Artıq Suriya ordusu Hələb şəhərinə nəzarəti ələ keçirib. Suriya ordusunun diqqətinin Hələbə yönəldiyi bir zamanda İŞİD Palmira şəhərini yenidən işğal edib. Suriyada hər gün vəziyyət daha da mürəkkəbləşir.

Suriyada baş verənlərlə bağlı hərbi ekspert Üzeyir Cəfərov Ölkə.Az-a danışıb:

"Suriya ilə bağlı məsələ planlaşdırıldığı məcrada getmir. Böyük qüvvələr arasında olan anlaşılmazlıq, tərəflərin bir-biri ilə dil tapa bilməməsi, bəziləri qüvvələrin Suriya ordusunu, bəzilərinin isə Əsəd rejiminə müxalif olanları dəstəkləməsi ölkəni bu vəziyyətə çatdırıb. Suriyada böyük güclərin planı əsasında iş gedir. Hazırda ölkənin bölünmə prosesi davam edir.

Suriya ordusu Hələbdə müxaliflərə qarşı son döyüş əməliyyatlarını həyata keçirir. Hələb tam azad edildikdən sonra Rakkanın koalisiya qüvvələri tərəfindən bombalanması planlaşdırılır. Suriyada sözün həqiqi mənasında xaos hökm sürür. Suriya məsələsində bir daha onun şahidi oluruq ki, böyük güclər yalnız öz maraqları çərçivəsində hərəkət edirlər.

Suriyada vəziyyət gün keçdikcə nəzarətdən çıxır. Türkiyənin Əsədə olan münasibəti, Rusiyanın bu məsələyə müdaxiləsi Türkiyənin fikrindən daşınması, ancaq sonradan Türkiyənin hansı yolla olursa olsun, Əsəd rejiminin devrilməsi ilə bağlı fikirlər səsləndirməsi Suriyadakı vəziyyəti daha da qəlizləşdirir. Suriyada xaos hökm sürür. Ölkənin əvvəlki vəziyyətinə qayıtması üçün bir neçə on illik kifayət etməyəcək. Faktiki olaraq əməliyyatlar deyil, çaşqınlıq yaradıblar. Dağıntıların sayı-hesabı yoxdur. ABŞ-la Rusiyanın Suriya uğrunda apardığı mübarizədə həddindən artıq gərginlik yaranıb. Suriyanın gələcəyini dağıdılmış, viran qoyulmuş, ayrı-ayrı vilayətlərə, bölgələrə bölünmüş bir ərazi kimi görürəm.

Əgər əvvəllər İŞİD-lə mübarizə aparılırdısa, indi İŞİD də yaddan çıxıb. Böyük güclər İŞİD-i bitirmək məsələsini arxa plana keçiriblər. ABŞ-ın hazırki prezidenti yanvarın 20-ni gözləyir ki, hakimiyyəti sağ-salamat təhvil versin. Bundan sonra Donald Tramp ABŞ administrasiyasına rəhbərlik edəcək. Tramp isə Moskvaya meyilli olacaq. Bu açıq-aydın görünür. Türkiyə də Suriya ilə bağlı problemdə müəyyən işlər görməyə çalışır, ancaq əvvəlki əzm və qətiyyəti yoxdur.

Suriya keçmiş SSRİ-nin viran qoyduğu, bu günə qədər də dirçələ bilməyən Əfqanıstanın gününə düşəcək. Burada da eyni mənzərənin şahidi olacağıq".

Səxavət Məmməd
Ölkə.Az