Türkiyənin tərəf müqabili Qərb, ABŞ, NATO-dur

Türkiyə tərəfi səfirin öldürülməsindən dərhal sonra bu işin arxasında Fətullah Gülənin olduğunu bəyan etdi.

Hətta sui-qəsdiçinin evindən Fətullah Gülənə aid ədəbiyyatlar da çıxıb.

Türkiyə höküməti terror aktından sonra ABŞ-dan Fətullah Güləni tələb etdi. ABŞ-ın isə Fətullah Güləni Türkiyəyə verib-verməyəcəyi məlum deyil.

Səfirin öldürülməsi və bu qətl ətrafında gedən siyasi oyunlar barədə politoloq Zərdüşt Əlizadə fikirlərini Ölkə.Az-la bölüşüb:

"Səfirin qətlə yetirilməsi adi hadisə deyildir. Terror aktı nəticəsində onlarla insan qətlə yetirilir. Nəticədə heç nə dəyişmir. Ancaq Rusiya və Türkiyə siyasi rəhbərliyi bu qətlin mənasını anlayır.

Rusiya və Türkiyə rəhbərliyi açıq şəkildə bildirdi ki, bu terror hadisəsi iki dövlətin münasibətlərinə təsir etməyəcək. Münasibətləri inkişaf etdirmək tərəflərin qəti niyyətidir".

Bu hadisə Rusiya və Türkiyəni daha da yaxınlaşdırdı. Türkiyənin bundan sonra Qərblə münasibətlərinin hansı istiqamətdə inkişaf edəcəyi ilə bağlı politoloq bildirdi ki, Türkiyənin tərəf müqabili Qərb, ABŞ, NATO-dur:

"Türkiyə ABŞ, NATO, Qərblə yaxın münasibətə olmasaydı adi, hörmətsiz müsəlman dövlətlərinin birinə çevrilə bilərdi. Məhz Türkiyənin Qərblə olan münasibətləri, NATO-nun üzvü olması, onu bütün müsəlman dünyasında nüfuz, hörmət sahibi edib. Türkiyə də bunu çox gözəl anlayır və Türkiyə belə də davam edəcək".

Bu sui-qəsddən sonra ABŞ-ın Fətullah Güləni Türkiyəyə verib- verməyəcəyi məsələsinə toxunan Zərdüşt Əlizadə dedi ki, bu məsələ FETÖ ilə bağlanıb, ancaq bunun sübutu yoxdur:

"Bu fürsətdən istifadə edib siyasi rəqibini vurmaqdır. ABŞ Fətullah Güləni heç bir zaman verməyəcək".

Səxavət Məmməd
Ölkə.Az