İran səfirliyindən Həsən Ruhaninin Ermənistana səfərinə ŞƏRH
İranın Bakıdakı Səfirliyi prezident Həsən Ruhaninin Ermənistana səfər etməsinə və iki ölkə arasında yüksək əməkdaşlıqla bağlı müqavilələrin imzalanmasının Azərbaycanda ciddi etirazla qarşılanmasını şərh edib.
Səfirliyin mətbuat katibi Məhəmməd Rza Nəcəfi “Ölkə.az”-a açıqlamasında bildirib ki, İranın qonşu Ermənistanla qurduğu əlaqələr eyni zamanda Azərbaycanla da mövcuddur:
“Hazırda İran ilə Azərbaycan arasında əlaqələr bütün sahələrdə inkişaf edir. İranın Azərbaycanla da böyük əməkdaşlıq müqavilələri var. Bu yaxınlarda Bakıda İran-Azərbaycan Müştərək İqtisadi Komissiyasının toplantısı da təşkil olunacaq. Bütün bunlar isə iki ölkə arasında münasibətləri daha da gücləndirmək üçün həyata keçirilir. Bizim əsas istəyimiz odur ki, dövlətlərimiz və xalqlarımız hər zaman mehriban qonşuluq və dostluq şəraitində yaşasın. Biz də hər zaman bu siyasəti dəstəkləyəcəyik. İran öz qonşularının hər zaman sülh və dostluq şəraitində yaşamasını arzu edir”.
Məhəmməd Rza Nəcəfi əlavə edib ki, İranın Azərbaycana yeni təyin olunan səfiri Cavad Cahangirzadənin yaxın zamanlarda mətbuat konfransı keçirməsi də gözlənilir.
Xatırladaq ki, İran prezidenti Həsən Ruhani dekabrın 21-də Ermənistana birgünlük səfəri zamanı Serj Sarkisyanla əlaqələrin inkişafı məqsədi ilə 5 əməkdaşlıq sənədi imzalayıb. Bundan başqa, tərəflər Hökumətlərarası 4 altkomissiyanın yaradılmasına razılaşıb, ortaq bəyanat qəbul ediblər.
Zaur Əziz
